കോഴിക്കോട്- ബര്‍ഗര്‍ ലോഞ്ചിന്റെ മറവില്‍ റിജിഡ് ഫുഡ്‌സ് കോടികളുടെ നിക്ഷേപം
തട്ടിയെടുത്തുവെന്ന പരാതിയില്‍ മാനേജിംഗ് പാര്‍ടണര്‍ എം.എച്ച് ഷുഹൈബിനെ (42) പന്നിയങ്കര പോലീസ് അറസ്റ്റ് ചെയ്തു. മംഗളൂരു സ്വദേശി ടി.എം അബ്ദുള്‍ വാഹിദിന്റെ പരാതിയില്‍ മംഗലാപുരം കോടതി പുറപ്പെടുപ്പിച്ച വാറന്റിലാണ് പ്രതിയെ അറസ്റ്റ് ചെയ്തതെന്ന് പന്നിയങ്കര പോലീസ് അറിയിച്ചു.
ഒരു വര്‍ഷം മുന്‍പ് അബ്ദുല്‍ വാഹിദിന് ബര്‍ഗര്‍ ലോഞ്ച് ഹോട്ടല്‍ തുടങ്ങാമെന്ന വ്യവസ്ഥയില്‍ 70 ലക്ഷം വാങ്ങിയിരുന്നു. ഗാറന്റിയായി ചെക്കും നല്‍കി. എന്നാല്‍ ഒരു വര്‍ഷം കഴിഞ്ഞിട്ടും തുടര്‍ നടപടികള്‍ ഇല്ലാത്തതിനാല്‍ പണം തിരികെ ആവശ്യപ്പെട്ടപ്പോള്‍ മറുപടി നല്‍കിയില്ല. പോലീസില്‍ പരാതി കൊടുത്തിട്ടും ഫലമുണ്ടായില്ല. തുടര്‍ന്ന് അബ്ദുല്‍ വാഹിദ് മംഗലാപുരം കോടതിയെ സമീപിക്കുകയായിരുന്നു. സമാനമായ രീതിയില്‍ മാത്തോട്ടം സ്വദേശി സാലി, അഫ്രില്‍ ഉള്‍പ്പെടെ ഏഴു പേരില്‍ നിന്നും മൊത്തം നാലു കോടിയോളം രൂപ നിക്ഷേപമായി വാങ്ങിയെന്ന പരാതി നിലവിലുണ്ട്. ഉച്ചയോടെ കോടതിയില്‍ ഹാജരാക്കിയ പ്രതിയെ റിമാന്റ് ചെയ്തു.
