ചെന്നൈ - വ്യാജമദ്യ ദുരന്തത്തില്‍ തമിഴ്‌നാട്ടില്‍ മരിച്ചവരുടെ എണ്ണം 22 ആയി. ദുരന്തത്തെ തുടര്‍ന്ന് പോലീസ് നടത്തിയ റെയ്ഡില്‍ വ്യാജമദ്യ വില്‍പ്പനയുമായി ബന്ധപ്പെട്ട് 2466 കേസുകള്‍ രജിസ്റ്റര്‍ ചെയ്തു. ഇതുവരെ 2461 പേര്‍ അറസ്റ്റിലായിട്ടുണ്ട്. 21,611 ലീറ്റര്‍ വ്യാജമദ്യം കണ്ടെത്തി നശിപ്പിക്കുകയും ചെയ്തു. 17,031 കുപ്പി വിദേശമദ്യവും പിടികൂടിയിട്ടുണ്ട്. സംഭവവുമായി ബന്ധപ്പെട്ട് നാല് പൊലീസുകാരെ സസ്പെന്‍ഡ് ചെയ്തതായി തമിഴ്നാട് മുഖ്യമന്ത്രി എം.കെ സ്റ്റാലിന്‍ അറിയിച്ചു. വില്ലുപുരം, ചെങ്കല്‍പ്പട്ട് ജില്ലയില്‍ നിന്നുള്ളവരാണ് മരിച്ചത്. വ്യാവസായിക ആവശ്യത്തിന് ഉപയോഗിക്കുന്ന മെതനോള്‍ കലര്‍ത്തിയതാണ് മരണത്തിനിടയാക്കിയത്. മരിച്ചവരുടെ കുടുംബങ്ങള്‍ക്ക് പത്ത് ലക്ഷം രൂപ വീതവും ചികില്‍സയിലുള്ളവര്‍ക്ക് അന്‍പതിനായിരം രൂപയും ധനസഹായം നല്‍കുമെന്ന് മുഖ്യമന്ത്രി എം.കെ സ്റ്റാലിന്‍ പ്രഖ്യാപിച്ചിട്ടുണ്ട്.
