ന്യൂദല്‍ഹി- സാങ്കേതിക പ്രശ്നങ്ങളെ തുടര്‍ന്ന് ഇന്ത്യൻ എയർഫോഴ്‌സിന്റെ ഹെവി ലിഫ്റ്റർ സി-17 ഗ്ലോബ്മാസ്റ്റർ റൺവേയില്‍ കുടുങ്ങി. തുടർന്ന് ലേ എയർപോർട്ട് ചൊവ്വാഴ്ച അടച്ചു. ചെറിയ തോതിലുള്ള സാങ്കേതിക തകരാറാണ് വിമാനം കുടുങ്ങാന്‍ കാരണം. ഇതു പരിഹരിച്ചതായും റണ്‍വേ നാളെയോടെ പ്രവർത്തനക്ഷമമാകുമെന്നും അധികൃതർ അറിയിച്ചു. റൺവേ പ്രവർത്തനരഹിതമായതിനാല്‍ നിരവധി വിമാനങ്ങള്‍ വഴിതിരിച്ചുവിട്ടു. ഇൻഡിഗോ, എയർ ഇന്ത്യ, സ്പൈസ് ജെറ്റ്, വിസ്താര എന്നിവയുൾപ്പെടെ ആഭ്യന്തര വിമാനക്കമ്പനികളിൽ നിന്നുള്ള എല്ലാ വിമാനങ്ങളും റദ്ദാക്കി.
യുഎസ് ആസ്ഥാനമായുള്ള ബോയിംഗ് ഡിഫൻസ് നിർമ്മിച്ച ഒരു ഹെവി-ലിഫ്റ്റർ കാർഗോ വിമാനമാണ് C-17 ഗ്ലോബ്മാസ്റ്റർ, ലോകത്തെവിടെയും കഠിനമായ ഭൂപ്രദേശങ്ങളിലുള്ള ചെറിയ എയർഫീൽഡുകളിലേക്ക് വലിയ ഉപകരണങ്ങളും സപ്ലൈകളും സൈനികരെയും നേരിട്ട് കൊണ്ടുപോകാൻ കഴിയും.
