തിരുവനന്തപുരം - ആറ്റിങ്ങലിൽ എ.ടി.എം കൗണ്ടറിനു തീപിടിച്ചു. ആലംകോട്ടെ ഫെഡറൽ ബാങ്കിന്റെ എ.ടി.എം കൗണ്ടറിനാണ് തീപിടിച്ചത്. ഇന്ന് രാവിലെ എട്ടരയോടെയാണ് സംഭവം.
കൗണ്ടറിനുള്ളിൽ നിന്ന് പുക ഉയരുകയും ഫയർ അലാറം അടിക്കുകയും ചെയ്യുകയായിരുന്നുവെന്ന് നാട്ടുകാർ പറഞ്ഞു. കൗണ്ടറിനുള്ളിൽ തീപ്പടരുന്നത് കണ്ട ഉടൻ പോലീസിനെയും അഗ്നിശമന സേനയെയും വിളിക്കുകയായിരുന്നു. ഉടനെ സ്ഥലത്ത് എത്തിയ സംഘം കൗണ്ടറിനുള്ളിലെ തീക്കെടുത്തിയതിനാൽ സമീപത്തെ ബാങ്കിലേക്കും മറ്റ് സ്ഥാപനങ്ങളിലേക്കും തീ പടർന്നില്ല. തീപിടുത്തത്തിൽ എ.ടി.എം കൗണ്ടറിന്നുള്ളിലെ എ.സി ഉൾപ്പടെയുള്ള യന്ത്രസാമഗ്രികൾ ഭാഗികമായി കത്തി നശിച്ചു. ഷോർട്ട് സർക്യൂട്ട് ആണെന്നാണ് സംശയിക്കുന്നത്.
