ന്യൂദൽഹി- രാഹുൽ ഗാന്ധി നയിക്കുന്ന ഭാരത് ജോഡോ യാത്രയിൽ പങ്കെടുത്ത് തെന്നിന്ത്യൻ നടൻ കമൽ ഹാസൻ. ദൽഹിയിലാണ് മൂന്നു മണിക്കൂറോളം രാഹുൽ ഗാന്ധിയുടെ യാത്രയിൽ കമൽ ഹാസൻ ഭാഗമായത്. കോൺഗ്രസിന്റെ ഭാരത് ജോഡോ യാത്രയിൽ ചേരുന്നതും രാഹുൽ ഗാന്ധിയോടൊപ്പം നടക്കുന്നതും വൻ രാഷ്ട്രീയ അബദ്ധമാകുമെന്ന് പറഞ്ഞാണ് ആദ്യം ആളുകൾ തന്റെ അടുത്തേക്ക് വന്നതെന്ന് മക്കൾ നീതി മയ്യം സ്ഥാപകനായ കമൽഹാസൻ പറഞ്ഞു.
'ഞാൻ എന്നോട് തന്നെ ചോദിച്ചു. രാജ്യത്തിന് എന്നെ ആവശ്യമുള്ള സമയമാണിത്. കമൽ, എന്റെ ആന്തരിക ശബ്ദം പറഞ്ഞു, ഭാരത് തോഡ്‌നെ കി നഹി ജോദ്‌നെ കി മദാദ് കരോ (രാജ്യത്തെ ഒന്നിപ്പിക്കാൻ സഹായിക്കൂ, തകർക്കരുത്). കമൽഹാസൻ പറഞ്ഞു. അതേസമയം, രാഷ്ട്രീയ കൂട്ടുകെട്ടുകളെ കുറിച്ച് താരം സംസാരിച്ചില്ല. 2021 ഏപ്രിലിൽ തമിഴ്‌നാട്ടിൽ ആദ്യ തിരഞ്ഞെടുപ്പിൽ മത്സരിച്ച അദ്ദേഹത്തിന്റെ പാർട്ടി തിരഞ്ഞെടുപ്പ് പോരാട്ടത്തിൽ പരാജയപ്പെട്ടിരുന്നു.
ഇന്ന് രാവിലെയാണ് ഹരിയാനയിൽ നിന്ന് കോൺഗ്രസ് യാത്ര ഡൽഹിയിലേക്ക് കടന്നത്. യാത്ര ദൽഹിയിലെ ആശ്രാമം ചൗക്കിൽ എത്തുന്നതിന് മുമ്പ് സോണിയ ഗാന്ധി, മുഖംമൂടി ധരിച്ച് രാഹുൽ ഗാന്ധിക്കും മകൾ പ്രിയങ്ക ഗാന്ധി വധേരയ്ക്കുമൊപ്പം കുറച്ച് മിനിറ്റ് നടന്നു.
യാത്ര തടയാൻ കേന്ദ്രം ഒഴികഴിവുകൾ നിരത്തുകയാണെന്ന് ഗാന്ധി പറഞ്ഞു. കോവിഡ് പ്രോട്ടോക്കോളുകൾ പാലിക്കാൻ കഴിയുന്നില്ലെങ്കിൽ മാർച്ച് നിർത്തുന്നത് പരിഗണിക്കണമെന്ന് ആരോഗ്യമന്ത്രി മൻസുഖ് മാണ്ഡവ്യ ഗാന്ധിക്ക് കത്തെഴുതിയിരുന്നു.
സെപ്തംബർ ഏഴിന് കന്യാകുമാരിയിൽ ആരംഭിച്ച് കശ്മീരിൽ സമാപിക്കുന്ന യാത്ര ഇതുവരെ ദൽഹി, ഹരിയാന, തമിഴ്‌നാട്, കേരളം, ആന്ധ്രാപ്രദേശ്, കർണാടക, തെലങ്കാന, മഹാരാഷ്ട്ര, മധ്യപ്രദേശ്, രാജസ്ഥാൻ എന്നിവിടങ്ങളിൽ സഞ്ചരിച്ചു.
മതപരമായ വ്യത്യാസങ്ങൾ ആയുധമാക്കി വിദ്വേഷം പ്രചരിപ്പിക്കുന്ന ബി.ജെ.പി സർക്കാരിനെതിരെ രൂക്ഷ വിമർശനവുമായി കോൺഗ്രസ് എം.പി രാഹുൽ ഗാന്ധി. ഭാരത് ജോഡോ യാത്ര ചെങ്കോട്ടയിൽ എത്തിയപ്പോൾ നടത്തിയ പ്രസംഗത്തിനിടെയാണ് രാഹുൽ ഗാന്ധി ഇക്കാര്യം പറഞ്ഞത്. യഥാർത്ഥ പ്രശ്‌നങ്ങളിൽ നിന്ന് നിങ്ങളുടെ ശ്രദ്ധ തിരിക്കാൻ ഹിന്ദു-മുസ്‌ലിം വിദ്വേഷം 24 മണിക്കൂറും പ്രചരിപ്പിക്കുകയാണെന്ന് രാഹുൽ ആരോപിച്ചു.
കോൺഗ്രസ് നേതാക്കളായ സോണിയ ഗാന്ധിയും പ്രിയങ്കാ ഗാന്ധിയും ഇന്ന് രാവിലെ യാത്രയിൽ പങ്കെടുത്തു. പിന്നീട് മാർച്ച് ചെങ്കോട്ടയ്ക്ക് സമീപം എത്തിയപ്പോൾ നടൻ കമൽഹാസലും രാഹുൽ ഗാന്ധിക്കൊപ്പം നടന്നു. ഞാൻ 2,800 കിലോമീറ്റർ നടന്നു, പക്ഷേ ഒരു വിദ്വേഷവും കണ്ടില്ല. ഞാൻ ടി.വി ഓണാക്കുമ്പോൾ, അക്രമമാണ് കാണുന്നതെന്നും രാഹുൽ ഗാന്ധി പറഞ്ഞു. ഈ ഘട്ടത്തിലെ യാത്രയുടെ അവസാന ദിവസമായിരുന്നു ഇന്നലെ. യാത്രക്ക് ഇനി ഒൻപത് ദിവസത്തെ ഇടവേളയാണ്.
'മാധ്യമങ്ങൾ സുഹൃത്താണ്, പക്ഷേ അത് ഒരിക്കലും നമ്മൾ പറയുന്നതിന്റെ യാഥാർത്ഥ്യം കാണിക്കുന്നില്ല. സ്‌റ്റേജിന്റെ പിന്നിൽ നിന്നുള്ള ഒരു ഗൂഢാലോചനയാണ് കാരണം. എന്നാൽ ഈ രാജ്യം ഒന്നാണ്, എല്ലാവരും സൗഹാർദ്ദത്തോടെ ജീവിക്കാൻ ആഗ്രഹിക്കുന്നുവെന്നും രാഹുൽ ഗാന്ധി പറഞ്ഞു
