ന്യൂദൽഹി - സിക്കിമിൽ സൈനിക വാഹനം മറിഞ്ഞ് മരിച്ചവരിൽ പാലക്കാട് സ്വദേശിയും. മാത്തൂർ ചെങ്ങണിയൂർക്കാവ് സ്വദേശി വൈശാഖ് (26) ആണ് മരിച്ചത്. 221 കരസേന റജിമെന്റിൽ നായിക്കായി സേവനം ചെയ്യുകയായിരുന്നു. സൈനികർ സഞ്ചരിച്ച ട്രക്ക് കൊക്കയിലേക്ക് മറിഞ്ഞുണ്ടായ അപകടത്തിൽ 16 സൈനികരാണ് മരിച്ചത്. ചൈനയുമായും ഭൂട്ടാനുമായും ഇന്ത്യ അതിർത്തി പങ്കിടുന്ന മേഖലയിൽ ഇന്ന് രാവിലെ എട്ടരയോടെയാണ് അപകടമുണ്ടായത്. അതീവ ദുഷ്‌കരമായ മല മുകളിലെ റോഡിലെ വളവ് തിരിയുന്നതിനിടെ ട്രക്ക് തെന്നി മലയിടുക്കിലേക്ക് വീഴുകയായിരുന്നു.
ചെങ്ങണിയൂർക്കാവ് സ്വദേശി സഹദേവന്റെ മകനാണ് വൈശാഖ്. നാല് വർഷമായി ഇന്ത്യൻ സേനയിൽ പ്രവർത്തിക്കുന്നു. ഒക്ടോബറിലാണ് ഒരു മാസത്തെ ലീവ് കഴിഞ്ഞ് വൈശാഖ് മടങ്ങിയത്. സംഭവത്തിൽ പ്രധാനമന്ത്രിയും പ്രതിരോധമന്ത്രിയും കോൺഗ്രസ് നേതാവ് രാഹുൽഗാന്ധിയും അതീവ ദു:ഖം രേഖപ്പെടുത്തി.
