മെസ്സി, ആല്‍വരേസ് ഷോ,
അര്‍ജന്റീന ഫൈനലില്‍
ദോഹ - ലിയണല്‍ മെസ്സിയുടെയും യൂലിയന്‍ ആല്‍വരേസിന്റെയും മാന്ത്രിക പ്രകടനത്തിലൂടെ അര്‍ജന്റീന ലോകകപ്പ് ഫുട്‌ബോളിന്റെ ഫൈനലിലേക്ക് ടിക്കറ്റെടുത്തു. ആല്‍വരേസിന്റെ ഇരട്ട ഗോളില്‍ അവര്‍ ക്രൊയേഷ്യയെ 3-0 ന് തകര്‍ത്തു. കഴിഞ്ഞ ലോകകപ്പിന്റെ ഗ്രൂപ്പ് ഘട്ടത്തില്‍ അര്‍ജന്റീനയെ ഇതേ മാര്‍ജിന് ക്രൊയേഷ്യ തോല്‍പിച്ചിരുന്നു. മെസ്സിയുടെ പെനാല്‍ട്ടി ഗോളിലാണ് അര്‍ജന്റീന ലീഡ് നേടിയത്. ആല്‍വരേസ് ഒറ്റയാന്‍ കുതിപ്പില്‍ സ്‌കോര്‍ ചെയ്തതോടെ 2-0 ന് അര്‍ജന്റീന ഇടവേളക്കു പോയി.
ഇടവേളക്കു ശേഷം ക്രൊയേഷ്യ ശക്തമായ സമ്മര്‍ദ്ദം ചെലുത്തുകയും അര്‍ജന്റീന ഇറങ്ങിനിന്ന് പ്രതിരോധിക്കുകയും ചെയ്യുന്നതിനിടയിലാണ് മെസ്സി മാജിക്കില്‍ അര്‍ജന്റീന മൂന്നാമത്തെ ഗോളടിക്കുന്നത്. ഇരുപതുകാരനായ ജോസ്‌കൊ ഗ്വാര്‍ദിയോള്‍ പിന്നാലെ കൂടിയിട്ടും വലതു വിംഗിലൂടെ കുതിച്ച മെസ്സി ബോക്‌സിലേക്ക് കയറിയ ശേഷം വെട്ടിത്തിരിഞ്ഞ് തളികയിലെന്ന പോലെ നല്‍കിയ പാസ് വലയിലേക്ക് പായിക്കേണ്ട പണിയേ ആല്‍വരേസിനുണ്ടായുള്ളൂ. മത്സരത്തില്‍ ആല്‍വരേസിന്റെ രണ്ടാം ഗോളായിരുന്നു അത്. മെസ്സിയുടെ രണ്ടാം അസിസ്റ്റും. അതോടെ ക്രൊയേഷ്യയുടെ ആവേശം ചോര്‍ന്നു. ലൂക്ക മോദ്‌റിച് സബ്‌സ്റ്റിറ്റിയൂട്ട് ചെയ്യപ്പെടുകയും ചെയ്തതോടെ അര്‍ജന്റീന ഫൈനല്‍ ഉറപ്പാക്കി.
ആല്‍വരേസായിരുന്നു ആദ്യ പകുതിയില്‍ അര്‍ജന്റീനയുടെ ഹീറോ. ആല്‍വേരസിനെ ഗോളി ഡൊമിനിക് ലിവാകോവിച് വീഴ്ത്തിയതിനായിരുന്ന അര്‍ജന്റീനക്ക് പെനാല്‍ട്ടി ലഭിച്ചത്. മെസ്സി നിശ്ചിത സമയത്ത് മൂന്നാം തവണ ഈ ലോകകപ്പില്‍ പെനാല്‍ട്ടി ഗോളാക്കി. നിമിഷങ്ങള്‍ക്കമായിരുന്നു മധ്യവരയില്‍ നിന്ന് കുതിച്ച് ആല്‍വരേസിന്റെ അതിമനോഹരമായ ഒറ്റയാന്‍ ഗോള്‍.
ഇരു ടീമുകളും ചടുലനീക്കങ്ങളുമായി തുടക്കം മുതല്‍ നിയന്ത്രണം പിടിക്കാന്‍ ശ്രമിച്ചു. മുപ്പത്തിനാലാം മിനിറ്റില്‍ പക്ഷെ ക്രൊയേഷ്യന്‍ പ്രതിരോധത്തിന് പാളി. പ്രതിരോധം കയറി നില്‍ക്കെ എന്‍സൊ ഫെര്‍ണാണ്ടസ് ഉയര്‍ത്തി നല്‍കിയ പാസുമായി ആല്‍വരേസ് കുതിച്ചു. ബോക്‌സില്‍ കയറി തന്റെ തലക്കു മുകളിലൂടെ പന്തുയര്‍ത്താന്‍ ശ്രമിച്ച ആല്‍വരേസിനെ ഗോളി തടുത്തിട്ടു. മഞ്ഞക്കാര്‍ഡ് നല്‍കുകയും റഫറി പെനാല്‍ട്ടിക്ക് വിസിലൂതുകയും ചെയ്തു. ഈ ലോകകപ്പില്‍ നിശ്ചിത സമയത്ത് നാലാമത്തെ പെനാല്‍ട്ടി എടുത്ത മെസ്സിക്ക് മൂന്നാമത്തെ ഗോള്‍. വലതു മൂലയിലേക്ക് മെസ്സി തൊടുത്ത ബുള്ളറ്റ് പെനാല്‍ട്ടി ഹീറോ ലിവാകോവിച്ചിന് ഒരവസരവും നല്‍കിയില്ല. ഈ ലോകകപ്പില്‍ മെസ്സിയുടെ അഞ്ചാം ഗോള്‍, ലോകകപ്പുകളില്‍ പതിനൊന്നാം ഗോളോടെ അര്‍ജന്റീനയുടെ ടോപ്‌സ്‌കോററായി. ഗബ്രിയേല്‍ ബാറ്റിസ്റ്റിയൂട്ടയെ മറികടന്നു.
അഞ്ചു മിനിറ്റിനകം ആല്‍വരേസ് മാജിക്കില്‍ ലുസൈല്‍ സ്‌റ്റേഡിയം പ്രകമ്പനം കൊണ്ടു. സെന്റര്‍ സര്‍ക്കിളില്‍ മെസ്സി വീഴുകയും ഫൗളിനായി വാദിക്കുകയും ചെയ്യുന്നതിനിടെ റഫറി കളി തുടരാന്‍ ആംഗ്യം കാണിച്ചു. പന്തുമായി ആല്‍വരേസ് കുതിച്ചു. മൂന്നു ഡിഫന്റര്‍മാരെ വെട്ടിച്ചു കയറിയ ആല്‍വരേസ് ബോക്‌സില്‍ നിന്ന് വെടിയുതിര്‍ത്തു. ഡിയേഗൊ മറഡോണയുടെ വിഖ്യാത ഗോളിനൊപ്പമെത്തില്ലെങ്കിലും അതിന്റെ സ്മരണയുയര്‍ത്തിയ ഗോള്‍. ഗാലറിയില്‍ ബ്രസീല്‍ രോമാഞ്ചം റൊണാള്‍ഡിഞ്ഞൊ പോലും കൈയടിച്ചുപോയി.
തൊട്ടുപിന്നാലെ ലിവാകോവിച് രക്ഷകനായില്ലെങ്കില്‍ മെസ്സി മത്സരത്തിലെ തന്റെ രണ്ടാം ഗോള്‍ കണ്ടെത്തുമായിരുന്നു.
തുടര്‍ച്ചയായ അഞ്ചാമത്തെ മത്സരത്തിലാണ് അര്‍ജന്റീന 2-0 ന് മുന്നിലെത്തുന്നത്. ക്രൊയേഷ്യ എല്ലാ കളിയിലും ആദ്യം ഗോള്‍ വഴങ്ങിയ ശേഷമാണ് തിരിച്ചുവന്നത്. ഇത്തവണ തിരിച്ചുവരവുണ്ടായില്ല.
ആദ്യ കളി തോറ്റ ശേഷമാണ് 2010 ല്‍ സ്‌പെയിന്‍ ചാമ്പ്യന്മാരായത്. അതാവര്‍ത്തിക്കാനുള്ള അവസരമാണ് അര്‍ജന്റീനക്ക് ലഭിക്കുക. മൊറോക്കൊ-ഫ്രാന്‍സ് സെമിയിലെ വിജയികളുമായി ഇതേ സ്റ്റേഡിയത്തില്‍ അവര്‍ ഫൈനല്‍ കളിക്കും. 2014 ല്‍ മെസ്സിയുള്‍പ്പെട്ട അര്‍ജന്റീന എക്‌സ്ട്രാ ടൈമില്‍ ജര്‍മനിയോട് ഫൈനല്‍ തോറ്റിരുന്നു. ഇത്തവണ സൗദി അറേബ്യയോട് തോറ്റ ശേഷമാണ് അര്‍ജന്റീന കുതിപ്പ് തുടങ്ങിയത്.
