കൊല്ലം- നിർദ്ദിഷ്ട കഴക്കൂട്ടം കൊല്ലം ഐ.ടി ഇടനാഴിയുടെ ഭാഗമായി ജില്ലയിൽ ഐ.ടി പാർക്കുകൾ സ്ഥാപിക്കാൻ സ്ഥലം കണ്ടെത്തുന്നതിനുള്ള സാധ്യതാപഠനം ആരംഭിച്ചു. നിർവഹണ ഏജൻസിയായ കേരള സ്‌റ്റേറ്റ് ഇൻഫർമേഷൻ ടെക്‌നോളജി ഇൻഫ്രാസ്ട്രക്ചർ ലിമിറ്റഡിന്റെ നേതൃത്വത്തിലാണ് സാധ്യത പഠനം ആരംഭിച്ചിട്ടുള്ളത്. സാധ്യത പഠനത്തെ ചിറക്കര ഗ്രാമ പഞ്ചായത്ത് പ്രതീക്ഷയോടെയാണ് നോക്കി കാണുന്നത്.കിൻഫ്രയുടെ നേതൃത്വത്തിൽ വ്യവസായ പാർക്ക് സ്ഥാപിക്കാനായി ചിറക്കര ഗ്രാമ പഞ്ചായത്തിലെ പോളച്ചിറയിൽ 125 ഏക്കറോളം സ്ഥലം കണ്ടെത്തിയിരുന്നു. സ്ഥലം ഏറ്റെടുക്കുന്നതിനായി സർവേ നടത്തി പത്ത് വർഷം മുൻപ് കല്ലും സ്ഥാപിച്ചിരുന്നു. ഈ സ്ഥലം ഐ ടി പാർക്ക് സ്ഥാപിക്കാൻ പരിഗണിക്കുമെന്ന പ്രതീക്ഷയിലാണ് ചിറക്കരയിലെ ജനങ്ങൾ. സംസ്ഥാന ബജറ്റിൽ പ്രഖ്യാപിച്ച പദ്ധതി കിഫ്ബി വഴിയാണ് നടപ്പിലാക്കുന്നത്.അമ്പതിനായിരം മുതൽ രണ്ട് ലക്ഷം ചതുരശ്രയടി വിസ്തീർണ്ണത്തിലുള്ള ഐ ടി പാർക്കുകളാണ് ആദ്യ ഘട്ടത്തിൽ സ്ഥാപിക്കാൻ ഉദ്ദേശിക്കുന്നത്. അനുയോജ്യമായ ഭൂമികളുടെ അന്തിമ പട്ടിക വിദഗ്ധ സമിതി കണ്ടെത്തി ഉടൻതന്നെ സർക്കാരിന് സമർപ്പിക്കും.
ഐ ടി പാർക്കുകൾ സ്ഥാപിക്കാനുള്ള സാധ്യത പഠനത്തിൽ പരിഗണിക്കുന്ന ഘടകങ്ങളെല്ലാം പ്രകൃതി രമണീയമായ പോളച്ചിറയിൽ ഉൾപ്പെടുമെന്നുള്ളത് ചിറക്കരയുടെ പ്രതീക്ഷ വർധിപ്പിക്കുന്നു. ആയിരത്തി അഞ്ഞൂറോളം ഏക്കർ വരുന്ന വിശാലമായ പോളച്ചിറ പാടശേഖരത്തിന്റെ സമീപത്തായി പോളച്ചിറ, ഒഴുകുപാറ വാർഡുകളിലായാണ് 125 ഏക്കറോളം സ്ഥലം കിൻഫ്ര കണ്ടെത്തിയത്.
സർവേ നടത്തി പദ്ധതിയുടെ വിശദമായ രൂപരേഖയും തയ്യാറാക്കിയിരുന്നു. സ്ഥലം ഏറ്റെടുക്കുന്നത് സംബന്ധിച്ച് അനുബന്ധ നടപടികൾ മാത്രമുണ്ടായില്ല. നെടുങ്ങോലം സെൻട്രൽ സ്‌കൂളിന് സമീപത്ത് തുടങ്ങി ഒഴുകുപാറ, ധർമ്മഗിരി തെങ്ങുവിള, പോളച്ചിറ വരെയുള്ള പോളച്ചിറ പാടശേഖരത്തിന്റെ തീര പ്രദേശങ്ങളായ സ്ഥലമാണ് തെരെഞ്ഞെടുത്ത് കല്ല് സ്ഥാപിച്ചത്. ഇവിടെ സ്ഥലം ഏറ്റെടുക്കുമ്പോൾ പത്തിൽ താഴെ വീടുകൾ മാത്രമേ പദ്ധതി പ്രദേശത്ത് നിന്ന് ഒഴിപ്പിക്കേണ്ടി വരുന്നുള്ളൂ എന്നതും അനുകൂല സാഹചര്യമാണ്.
നിർദ്ദിഷ്ട സ്ഥലത്തിന് മധ്യഭാഗത്തായി 10 ഏക്കറോളം സ്ഥലം തണ്ണീർ തടമായി നിലവിലുണ്ട്. ഇതിലുണ്ടാകുന്ന നിയമ പ്രശ്‌നങ്ങൾ പരിഹരിക്കാൻ തണ്ണീർതടം നിലനിർത്തി പദ്ധതി രൂപരേഖ തയ്യാറാക്കിയാൽ മതിയെന്ന് വിദഗ്ധർ അഭിപ്രായപ്പെടുന്നു. വിദേശ-സ്വദേശ ഐ ടി കമ്പനികൾക്ക് ഒരേ പോലെ ഇഷ്ട്ടപ്പെടുന്ന കാലാവസ്ഥയും, സാധ്യത പഠനത്തിൽ പരിഗണിക്കുന്ന ഘടകങ്ങളായ ദേശീയപാത66, പരവൂർ റെയിൽവേ സ്‌റ്റേഷൻ എന്നിവ നാല് കിലോമീറ്റർ ദൂരത്തിലുമാണ്.
50 കിലോമീറ്റർ ദൂരത്തിൽ തിരുവനന്തപുരം അന്താരാഷ്ട്ര വിമാനത്താവളവും എട്ട് കിലോമീറ്റർ ദൂരത്തിൽ സർക്കാർ മെഡിക്കൽ കോളേജ് ആശുപത്രി, രണ്ട് കിലോമീറ്റർ ദൂരത്തിൽ ഗവ: രാമറാവു താലൂക്ക് ആശുപത്രി, സമീപ പ്രദേശത്ത് നിരവധി സ്‌കൂളുകൾ, കോളേജുകൾ എന്നിവ ഉള്ളതും പോളച്ചിറയുടെ സാധ്യത വർധിപ്പിക്കുന്നു.കാർഷിക മേഖലയായ ചിറക്കര ഗ്രാമപഞ്ചായത്ത് തനത് ഫണ്ടിന്റെ അപര്യാപ്തത മൂലം അടിസ്ഥാന വികസന പദ്ധതികൾ പോലും ഇഴഞ്ഞു നീങ്ങുന്ന അവസ്ഥയിലാണ്. പദ്ധതിയ്ക്കായി പോളച്ചിറ പരിഗണിച്ചാൽ ഗ്രാമ പഞ്ചായത്ത് റവന്യു വരുമാനം കുതിച്ചു ഉയരുകയും പ്രത്യക്ഷമായും പരോക്ഷമായും ആയിരക്കണക്കിന് തൊഴിൽ സാധ്യതകൾക്ക് വഴിയൊരുങ്ങുകയും ചെയ്യും.
ചിറക്കരയുടെ ഗ്രാമീണ ടൂറിസം പദ്ധതികളും സാക്ഷാത്കരിക്കപ്പെടുന്നതിനോടൊപ്പം പരവൂരിന്റെ അനന്തമായ ടൂറിസം സാധ്യതകളെയും അന്തർദേശീയ നിലവാരത്തിലേക്ക് എത്തിക്കാനും കഴിയും. പോളച്ചിറയിൽ കിൻഫ്രാ പാർക്കിനായി കണ്ടെത്തിയ സ്ഥലത്ത് ഐ ടി പാർക്ക് സ്ഥാപിക്കുന്നതിന് ചിറക്കര ഗ്രാമ പഞ്ചായത്ത് അധികൃതരും അടിയന്തര ഇടപെടൽ നടത്തണമെന്ന ആവശ്യവും ഉയരുന്നു. ഐ ടി പദ്ധതികൾക്കായുള്ള സാധ്യത പരിശോധനയിൽ പോളച്ചിറയേയും ഉൾപ്പെടുത്തുമെന്നുള്ള പ്രതീക്ഷയിലാണ് നാട്ടുകാർ. ചിറക്കര ഗ്രാമപഞ്ചായത്ത് അധികൃതരുടെയും, എം.പി, എം.എൽ.എ എന്നിവരുടെയും അടിയന്തര ഇടപെടൽ വിഷയത്തിൽ ഉണ്ടാകണമെന്ന ആവശ്യവും ശക്തമാണ്.
