ഹൈദരാബാദ്- ഉത്തര്‍പ്രദേശില്‍ ഭാവി തെരഞ്ഞെടുപ്പില്‍ സംസ്ഥാനത്തെ എല്ലാ സീറ്റുകളിലും ഓള്‍ ഇന്ത്യ മജ് ലിസെ ഇത്തിഹാദുല്‍ മുസ്ലിമീന്‍ (എ.ഐ.എം.ഐ.എം) മത്സരിക്കുമെന്ന് പാര്‍ട്ടി യു.പി പ്രസിഡണ്ട് ഷൗക്കത്ത് അലി പറഞ്ഞു. സമാജ്‌വാദി പാര്‍ട്ടിയിലെ നിരവധി നേതാക്കള്‍ അസദുദ്ദീന്‍ ഉവൈസിയുടെ നേതൃത്വത്തിലുള്ള പാര്‍ട്ടിയില്‍ ചേരുമെന്നും അദ്ദേഹം അവകാശപ്പെട്ടു.
ബിജെപിയെ പരാജയപ്പെടുത്താന്‍ മുസ്‌ലിംകള്‍ എല്ലായ്‌പ്പോഴും മതനിരപേക്ഷ ശക്തികളെ പിന്തുണച്ചിട്ടുണ്ടെന്നും അലി വാര്‍ത്താ ഏജന്‍സിയായ എഎന്‍ഐയോട് പറഞ്ഞു.
ജനങ്ങള്‍ ഇപ്പോള്‍ എംഐഎമ്മിലേക്കാണ് വരുന്നത്. ഈസ്റ്റ് യുപി, പുര്‍വാഞ്ചല്‍, സെന്‍ട്രല്‍ യുപി, ബുന്ദേല്‍ഖണ്ഡ് എന്നിവിടങ്ങളിലാണ് ഞങ്ങള്‍ മത്സരിക്കുന്നത്. സമാജ്‌വാദി പാര്‍ട്ടി നേതാക്കള്‍ എംഐഎമ്മില്‍ ചേരും. 2017ലെ തെരഞ്ഞെടുപ്പ് മാധ്യമങ്ങളിലൂടെയാണ് ബിജെപി ധ്രുവീകരിച്ചത്. ബിജെപിയെ പരാജയപ്പെടുത്താന്‍ സമാജ്‌വാദി പാര്‍ട്ടിക്ക് കഴിയുമെന്നാണ് മുസ്‌ലിംകള്‍ കരുതിയത്. സ്വാതന്ത്ര്യത്തിനു ശേഷം, ബിജെപിയെ പരാജയപ്പെടുത്താന്‍ മുസ്ലീങ്ങള്‍ എല്ലായ്‌പ്പോഴും മതേതര ശക്തികളെ പിന്തുണച്ചിട്ടുണ്ട്- അദ്ദേഹം പറഞ്ഞു. ഹിന്ദു, മുസ്‌ലിം പ്രശ്‌നങ്ങളില്‍ സംസാരിച്ചുകൊണ്ട് തന്റെ പാര്‍ട്ടി നേതാവ് ഉവൈസി ഒരിക്കലും ധ്രുവീകരിച്ചിട്ടില്ലെന്നും പാര്‍ട്ടി സമുദായത്തിന് വേണ്ടി പോരാടുന്നത് തുടരുമെന്നും അലി പറഞ്ഞു.
ഉവൈസി ഒരിക്കലും ഹിന്ദു,മുസ്‌ലിം പ്രശ്‌നങ്ങളെക്കുറിച്ച് സംസാരിച്ചിട്ടില്ല. യുപിയിലെ മുസ്ലീം പ്രദേശങ്ങളില്‍ ബാങ്കുകളൊന്നും തന്നെയില്ല. ഈ പ്രദേശങ്ങളില്‍ സ്‌കൂളുകളോ ശരിയായ ആശുപത്രികളോ മരുന്നുകളോ ഇല്ല. ഇതിനെല്ലാം വേണ്ടി ഞങ്ങള്‍ പോരാടും- അലി പറഞ്ഞു.
മുസ്ലീങ്ങളുമായി ബന്ധപ്പെട്ട വിഷയങ്ങളില്‍ സമാജ്‌വാദി പാര്‍ട്ടി മൗനം പാലിക്കുന്നതിനെ ചോദ്യം ചെയ്ത അദ്ദേഹം ഉത്തര്‍പ്രദേശിലെ മദ്രസകളില്‍ സര്‍വേ നടത്തുമ്പോള്‍ അഖിലേഷ് യാദവ് നിശബ്ദനാണെന്നും പറഞ്ഞു.
സമാജ്‌വാദി പാര്‍ട്ടിയിലോ ബിഎസ്പിയിലോ കോണ്‍ഗ്രസിലോ ഒരു മുസ്‌ലിം നേതാവും മുസ്‌ലിം ക്ഷേമത്തെക്കുറിച്ച് സംസാരിക്കുന്നില്ല. അസാദുദ്ദീന്‍ ഉവൈസി മാത്രമേ എന്തെങ്കിലും ചെയ്യൂ- അദ്ദേഹം പറഞ്ഞു.
