ന്യൂദല്‍ഹി- ആള്‍ട്ട് ന്യൂസ് സഹസ്ഥാപകന്‍ മുഹമ്മദ് സുബൈറിനെതിരെ പരാതി ഉന്നയിച്ച ട്വിറ്റര്‍ അക്കൗണ്ട് അപ്രത്യക്ഷമായി. സോഷ്യല്‍ മീഡിയ വെബ്സൈറ്റില്‍ സുബൈറിന്റെ 2018-ലെ ട്വീറ്റിനെതിരെ പരാതി ഉന്നയിക്കുകയും മാധ്യമപ്രവര്‍ത്തകനെതിരായ കേസിലേക്കും തിങ്കളാഴ്ച ദല്‍ഹി പോലീസിന്റെ അറസ്റ്റിലേക്കും നയിച്ച ട്വിറ്റര്‍ അക്കൗണ്ട് ബുധനാഴ്ച വൈകുന്നേരത്തോടെയാണ് ഇല്ലാതയത്..
സുബൈറിന്റെ അഭിഭാഷക വൃന്ദ ഗ്രോവര്‍ ദല്‍ഹി കോടതിയില്‍ പോലീസ് കസ്റ്റഡി നീട്ടുന്നതിനെതിരെ വാദിക്കുന്നതിനിടെ അക്കൗണ്ടിനെക്കുറിച്ചും അത് നടത്തുന്ന വ്യക്തിയുടെ ഉദ്ദേശ്യങ്ങളെക്കുറിച്ചും സംശയം ഉന്നയിച്ചതിന് തൊട്ടുപിന്നാലെയാണ് അക്കൗണ്ട് അപ്രത്യക്ഷമായത്.
'@balajikijaiin' എന്ന ഹാന്‍ഡിലിനു കീഴിലെ അക്കൗണ്ട് ഹനുമാന്‍ ഭക്ത് എന്ന പേരിലാണ് പ്രവര്‍ത്തിച്ചിരുന്നത്. 2021 ഒക്ടോബറില്‍ സൃഷ്ടിച്ചതാണെങ്കിലും അക്കൗണ്ടില്‍ നിന്നുള്ള ആദ്യ ട്വീറ്റ് ജൂണ്‍ 19-നായിരുന്നു.
ഇതിന്റെ അടിസ്ഥാനത്തിലാണ് ദല്‍ഹി പോലീസ് സ്പെഷ്യല്‍ സെല്ലിലെ ഇന്റലിജന്‍സ് ഫ്യൂഷന്‍ സ്ട്രാറ്റജിക് ഓപ്പറേഷന്‍സ് യൂണിറ്റിലെ ഒരു ഉദ്യോഗസ്ഥന്‍ സുബൈറിനെതിരെ എഫ്ഐആര്‍ രജിസ്റ്റര്‍ ചെയ്തത്.
സുബൈറിന്റെ നാല് വര്‍ഷം പഴക്കമുള്ള പോസ്റ്റ് പോലീസ് എങ്ങനെയാണ് കണ്ടെത്തിയതെന്നും മാന്ത്രികമായി എടുത്തതാണോ എന്നും ചൊവ്വാഴ്ച സിറ്റി കോടതിയില്‍ വാദിക്കുന്നതിനിടെ വൃന്ദ ഗ്രോവര്‍ സംശയം ഉന്നയിച്ചിരുന്നു.
2018 മാര്‍ച്ചിലെ സുബൈറിന്റെ ട്വീറ്റില്‍ സെന്‍ട്രല്‍ ബോര്‍ഡ് ഓഫ് ഫിലിം സര്‍ട്ടിഫിക്കേഷന്‍ അംഗീകരിച്ച 1983 ഹിന്ദി ചലച്ചിത്രമായ കിസ്സി സേ നാ കെഹ്നയില്‍ നിന്നുള്ള ഒരു ചിത്രം പോസ്റ്റ് ചെയ്തിരുന്നു. അതില്‍ ഒരു ഹോട്ടലിന്റെ പേര് 'ഹണിമൂണ്‍ ഹോട്ടല്‍' എന്നതില്‍ നിന്ന് 'ഹനുമാന്‍ ഹോട്ടല്‍' എന്നാക്കി മാറ്റിയതായി കാണിക്കുന്നു. 2014-ന് മുമ്പ്: ഹണിമൂണ്‍ ഹോട്ടല്‍; 2014ന് ശേഷം: ഹനുമാന്‍ ഹോട്ടല്‍''. സുബൈര്‍ ചിത്രം എഡിറ്റ് ചെയ്തതായി പോലീസ് വാദിച്ചപ്പോള്‍ പ്രസ്തുത ചിത്രത്തില്‍ ഒരു തരത്തിലും കൃത്രിമം കാണിച്ചിട്ടില്ലെന്നും സിനിമയില്‍ നിന്ന് എടുത്തതാണെന്നും ഗ്രോവര്‍ പറഞ്ഞു.
നാലു വര്‍ഷത്തിന് ശേഷം ഒരു അജ്ഞാത ട്വിറ്റര്‍ ഹാന്‍ഡില്‍ കുഴപ്പങ്ങള്‍ സൃഷ്ടിക്കാന്‍ തീരുമാനിച്ചതായതിനാല്‍ അതിന്റെ കാരണങ്ങള്‍ അന്വേഷിക്കണമെന്ന് ഈ വര്‍ഷം റീട്വീറ്റ് ചെയ്ത് 2018ലെ ട്വീറ്റ് പുനരുജ്ജീവിപ്പിച്ച ''ഹനുമാന്‍ ഭക്ത്'' അക്കൗണ്ട് പ്രവര്‍ത്തിപ്പിക്കുന്ന വ്യക്തിയുടെ പ്രഉദ്ദേശ്യത്തെ ചോദ്യം ചെയ്തുകൊണ്ട് വൃന്ദ ഗ്രോവര്‍ പറഞ്ഞു, എന്നാല്‍ ട്വിറ്റര്‍ ഹാന്‍ഡില്‍ അജ്ഞാതമല്ലെന്നും വിശദാംശങ്ങള്‍ വിശദാംശങ്ങള്‍ നല്‍കാതെ ആര്‍ക്കും ട്വിറ്റര്‍ അക്കൗണ്ട് തുറക്കാന്‍ കഴിയില്ലെന്നും പ്രോസക്യൂട്ടര്‍ വാദിച്ചു.
