ദക്ഷിണ കന്നഡ- കർണാടകയിലെ ഹിജാബ് വിവാദം അവസാനിക്കുന്ന ലക്ഷണമില്ല. കോളേജ് അധികൃതരുടെ നിർദേശം അവഗണിച്ചും വിദ്യാർഥിനികൾ ക്ലാസ് മുറികളിൽ ഹിജാബ് ധരിക്കുന്നത് തുടരുകയാണ്. ഹിജാബ് ധരിക്കാൻ വാശി പിടിക്കുന്ന വിദ്യാർഥിനികൾക്കെതിരെ നടപടിയെടുക്കുമെന്ന് ഉപ്പിനങ്ങാടി ഡിഗ്രി കോളേജ് വികസന സമിതി ചെയർമാൻ കൂടിയായ പുത്തൂർ നിയോജക മണ്ഡലത്തിലെ ബി.ജെ.പി എംഎൽഎ സഞ്ജീവ മുന്നറിയിപ്പ് നൽകി.
ഹിജാബിന്റെ പേരിൽ വർഗീയ സംഘടനകൾ വിദ്യാർത്ഥികളെ പ്രകോപിപ്പിക്കുകയാണെന്നും ഹൈക്കോടതി സ്പെഷ്യൽ ബെഞ്ച് വിധിയും കോളേജ് വികസന സമിതിയുടെ നിർദേശങ്ങളും ലംഘിക്കുന്ന വിദ്യാർത്ഥികൾക്കെതിരെ നടപടിയെടുക്കുമെന്നും അദ്ദേഹം പറഞ്ഞു.
ഹിജാബ് ധരിക്കണമെന്ന നിർബന്ധം പുലർത്തിയതു കാരണം 24 വിദ്യാർത്ഥികളെ ചൊവ്വാഴ്ച സസ്‌പെൻഡ് ചെയ്തിരുന്നു. പ്രതിഷേധം തുടർന്നാൽ കൂടുതൽ നടപടി സ്വീകരിക്കും. പെൺകുട്ടികൾ അവരുടെ മുൻഗണനയെക്കുറിച്ച് തീരുമാനിക്കണം. പഠനമാണോ മതപരമായ ആചാരങ്ങൾ പിന്തുടരുകയാണോ പ്രധാനം- അദ്ദേഹം പറഞ്ഞു.
മതപരമായ ആചാരങ്ങൾ പിന്തുടരുന്നതാണ് കൂടുതൽ പ്രധാനമെന്ന് വിദ്യാർത്ഥികൾ കരുതുന്നുവെങ്കിൽ, അവർ കോളേജിൽ നിന്ന് മാറുന്നതാണ് നല്ലത്. മതം അനുഷ്‌ഠിക്കാനുള്ള സൗകര്യമുള്ള വിദ്യാഭ്യാസം അവർക്ക് ലഭിക്കുമെന്നും അദ്ദേഹം പറഞ്ഞു.
ഒരു മുസ്ലിം നേതാവിന്റെ വാക്കുകളെങ്കിലും വിദ്യാർത്ഥികൾ കേൾക്കുകയും പിന്തുടരുകയും വേണമെന്ന് മുൻ മന്ത്രിയും കോൺഗ്രസ് എംഎൽഎയുമായ യു.ടി. ഖാദറിന്റെ പരാമർശം ഉദ്ധരിച്ച് അദ്ദേഹം പറഞ്ഞു. വിദ്യാർത്ഥികളുടെ നിരുത്തരവാദപരമായ പെരുമാറ്റം പൊറുപ്പിക്കില്ല. എല്ലാ മതവിഭാഗങ്ങളിലുമുള്ള വിദ്യാർത്ഥികൾക്ക് വിദ്യാഭ്യാസം നൽകുന്ന വിദ്യാഭ്യാസ സ്ഥാപനമാണ് സർക്കാർ കോളേജ്. ഹൈക്കോടതിയുടെ ഉത്തരവ് കർശനമായി നടപ്പാക്കാൻ എല്ലാ ശ്രമങ്ങളും നടത്തുമെന്നും അദ്ദേഹം പറഞ്ഞു.
ഹിജാബ് പ്രതിസന്ധിയുടെ പശ്ചാത്തലത്തിൽ കോളേജിന് അവധി പ്രഖ്യാപിച്ച ജില്ലാ കമ്മീഷണറുടെ തീരുമാനം അംഗീകരിച്ചിട്ടില്ല. അവധി പ്രഖ്യാപിച്ചാൽ വിദ്യാർഥികൾക്ക് ക്ലാസ് നഷ്ടമാകും. വിദ്യാർത്ഥികൾക്ക് അടുത്ത മാസം സെമസ്റ്റർ പരീക്ഷ നടത്തണം. ക്ലാസുകളുടെ സുഗമമായ നടത്തിപ്പ് ഉറപ്പാക്കാൻ നടപടിയെടുക്കുമെന്നും എം.എൽ.എ പറഞ്ഞു.
ഉഡുപ്പി പ്രീ-യൂണിവേഴ്‌സിറ്റി ഗേൾസ് കോളേജിലെ ആറ് വിദ്യാർഥിനികളുടെ പ്രതിഷേധത്തോടെ ആരംഭിച്ച ഹിജാബ് പ്രതിസന്ധി അന്താരാഷ്ട്ര പ്രശ്‌നമായി മാറിയിരുന്നു.
