ജയ്പുർ- രാജസ്ഥാൻ മുഖ്യമന്ത്രി പദം ഉടൻ അനുവദിക്കണമെന്ന് കോൺഗ്രസ് നേതാവ് സചിൻ പൈലറ്റ് കോൺഗ്രസ് അധ്യക്ഷ സോണിയ ഗാന്ധിയോട് ആവശ്യപ്പെട്ടതായി റിപ്പോർട്ട്. ഇക്കാര്യത്തിൽ ഉടൻ തീരുമാനമെടുക്കണമെന്നും സചിൻ ആവശ്യപ്പെട്ടു. രാജസ്ഥാനിൽ ഒരു വർഷം മാത്രമാണ് നിയമസഭയിലേക്ക് തെരഞ്ഞെടുപ്പ് നടക്കാൻ ബാക്കിയുള്ളത്. ഇക്കാര്യത്തിൽ ഉടൻ തീരുമാനമുണ്ടായില്ലെങ്കിൽ പഞ്ചാബിൽ സംഭവിച്ച അതേകാര്യം രാജസ്ഥാനിലും ആവർത്തിക്കുമെന്ന് സചിൻ സോണിയ ഗാന്ധിക്കും പ്രിയങ്കക്കും മുന്നറിയിപ്പ് നൽകി. പഞ്ചാബിൽ ചരൺജിത് സിംഗ് ചന്നിയെ അവസാന മണിക്കൂറിൽ മുഖ്യമന്ത്രിയാക്കിയത് ഭരണം നിലനിർത്താൻ സഹായകമായിരുന്നില്ല. കഴിഞ്ഞയാഴ്ച മൂന്ന് തവണ സോണിയ ഗാന്ധിയുമായി സചിൻ പൈലറ്റ് കൂടിക്കാഴ്ച നടത്തിയിരുന്നു. അടുത്ത വർഷം ഡിസംബറിലാണ് രാജസ്ഥാനിൽ തെരഞ്ഞെടുപ്പ് നടക്കുക.
രണ്ട് വർഷം മുമ്പ്, പൈലറ്റ് 18 എം.എൽ.എമാരെയും കൂട്ടി ദൽഹിയിൽ സോണിയ ഗാന്ധി അടക്കമുള്ള നേതാക്കളെ സന്ദർശിച്ചിരുന്നു. തന്നെ അനുകൂലിക്കുന്ന എം.എൽ.എമാർക്ക് മന്ത്രിസഭയിൽ കൂടുതൽ അവസരം നൽകണമെന്ന് ആവശ്യപ്പെട്ടായിരുന്നു സന്ദർശനം. ഇതേതുടർന്ന് നൂറോളം എം.എൽ.എമാരെ മുഖ്യമന്ത്രി അശോക് ഗെഹ്‌ലോട്ട് റിസോർട്ടിലേക്ക് മാറ്റി. ആഴ്ചകൾ നീണ്ട പിരിമുറുക്കങ്ങൾക്ക് ഒടുവിലാണ് സചിൻ അഴഞ്ഞത്. അന്ന് നൽകിയ വാഗ്ദാനം പാലിക്കാൻ കോൺഗ്രസ് നേതൃത്വത്തിന് സാധിച്ചിരുന്നില്ല. കഴിഞ്ഞ മാസം സോണിയ ഗാന്ധിയുമായി നടത്തിയ കൂടിക്കാഴ്ചയിൽ തന്റെ ക്ഷമ നശിച്ചുവെന്നും ഇനിയും കാത്തിരിക്കാനാകില്ലെന്നും സചിൻ പൈലറ്റ് മുന്നറിയിപ്പ് നൽകി.
