തൃശൂര്‍ - നഗരത്തിലെ സ്വകാര്യ ആശുപത്രിയിലെ ഡോക്ടറെ ഹണി ട്രാപ്പില്‍പ്പെടുത്തി പണം തട്ടാന്‍ ശ്രമം. രണ്ട് യുവതികള്‍ അറസ്റ്റില്‍. മണ്ണുത്തി കറപ്പം വീട്ടില്‍ നൗഫിയ ( 27), കായംകുളം സ്വദേശിനി നിസ (29) എന്നിവരെയാണ് അറസ്റ്റ് ചെയ്തത്.
വാട്‌സാപ്പിലുടെ അയച്ച സന്ദേശങ്ങള്‍ തങ്ങളെ അപകീര്‍ത്തിപ്പെടുത്തുന്നതാണെന്ന് വരുത്തി ഇയാളില്‍നിന്ന് പണം തട്ടാനുള്ള ശ്രമമാണ് പ്രതികള്‍ നടത്തിയത്. പരാതി നല്‍കാതിരിക്കണമെങ്കില്‍ മൂന്നു ലക്ഷം രൂപ നല്‍കണമെന്നാവശ്യപ്പെടുകായിരുന്നു പ്രതികള്‍. ഇതിന് വേണ്ടി പലതവണ വാട്‌സാപ്പ് കാള്‍ വഴിയും ചാറ്റ് വഴിയും ഭീഷണിപ്പെടുത്തി പണം തട്ടാന്‍ ശ്രമിച്ചതോടെ ഡോക്ടര്‍ പോലീസില്‍ പരാതി നല്‍കുകയായിരുന്നു. തുടര്‍ന്ന് വെസ്റ്റ് പോലീസ് നടത്തിയ അന്വേഷണത്തിലാണ് പ്രതികളെ പിടികൂടിയത്. രണ്ട് പേരും കൂടി ആസൂത്രണം ചെയ്താണ് ഡോക്ടറില്‍ നിന്ന് പണം തട്ടാന്‍ ശ്രമിച്ചതെന്ന് പോലീസ് പറഞ്ഞു. എ.സി.പി വി.കെ.രാജുവിന്റെ നേതൃത്വത്തില്‍ എസ്.ഐ.കെ.സി.ബൈജു,സിനീയര്‍ സി.പി.ഒ ഷൈജ,പ്രിയ, സി.പി.ഒ ഷിനോജ് എന്നിവരുടെ നേതൃത്വത്തിലാണ് പ്രതികളെ പിടികൂടിയത്.
