കൊണ്ടോട്ടി- ഭര്‍തൃമതിയായ വെസ്റ്റ് ബംഗാള്‍ യുവതിയെ വീട്ടില്‍ എത്തിക്കാമെന്ന് പറഞ്ഞ് കൂട്ടിക്കൊണ്ടുപോയി ഹരിയാനയിലെത്തിച്ച് പീഡിപ്പിച്ച കേസില്‍ യുവാവ് അറസ്റ്റില്‍. വെസ്റ്റ് ബംഗാള്‍ സ്വദേശിയായ കാജു (24)വിനെയാണ് കൊണ്ടോട്ടി പോലിസ് ഹരിയാനയിലെ ഗുരുഗ്രാമിലെ ചേരിയില്‍ വെച്ച് പിടികൂടിയത്.
കിഴിശേരി കുഴിഞ്ഞൊളത്ത് കുടുംബ സമേതം താമസിക്കുകയായിരുന്ന യുവതിയുമായി ഫോണിലൂടെ സൗഹൃദം സ്ഥാപിച്ച കാജു വെസ്റ്റ് ബംഗാളിലെ സ്വന്തം വീട്ടില്‍ എത്തിക്കാമെന്നറിയിച്ച് കൂട്ടിക്കൊണ്ടു പോവുകയായിരുന്നു. എന്നാല്‍ ഇയാള്‍ യുവതിയെ ഹരിയാനയിലെ ഗുരുഗ്രാമില്‍ ഒരു ചേരിയില്‍ എത്തിച്ച് 10 ദിവസത്തോളം മുറിയിലിട്ട് പീഡിപ്പിക്കുകയായിരുന്നു. ഭര്‍ത്താവിന്റെ പരാതിയില്‍ കൊണ്ടോട്ടി പോലിസ് കേസെടുത്ത് അന്വേഷിച്ച് വരികയായിരുന്നു. ഇതിനിടെയാണ് പ്രതിയുടെ കൈയില്‍ നിന്ന് രക്ഷപ്പെട്ട യുവതിയെ പോലിസ് കണ്ടെത്തിയത്. തുടര്‍ന്നുള്ള ചോദ്യം ചെയ്യലിലാണ് പീഡന വിവരം പുറത്തറിയുന്നത്.
കൊണ്ടോട്ടി ഡിവൈ.എസ്.പി കെ. അഷ്‌റഫിന്റെ മേല്‍നോട്ടത്തില്‍ കൊണ്ടോട്ടി പോലിസ് ഇന്‍സ്‌പെക്ടര്‍ എം.സി പ്രമോദ്, സബ് ഇന്‍സ്‌പെക്ടര്‍ അബ്ദുല്‍ അസീസ് കാര്യോട്ട്, ഒ. പ്രശാന്ത്, സജീവ് എന്നിവരാണ് പ്രതിയെ പിടികൂടിയത്.
