ന്യൂദല്‍ഹി- റഷ്യ-യുക്രൈന്‍ അതിര്‍ത്തി സംഘര്‍ഷ ഭീതിയെ തുടര്‍ന്ന് ആശങ്കയിലായ യുക്രൈനിലെ ഇന്ത്യന്‍ വിദ്യാര്‍ത്ഥികളെ സഹായിക്കാനായി വിദേശകാര്യ മന്ത്രാലയം പ്രത്യേക കണ്‍ട്രോള്‍ റൂം തുറന്നു. 24 മണിക്കൂറും പ്രവര്‍ത്തിക്കുന്ന ഹെല്‍പ്പ് ലൈനും ആരംഭിച്ചു. ഇന്ത്യയിലേക്ക് വേണ്ടത്ര വിമാന സര്‍വീസുകളില്ലാത്തതിനെ കുറിച്ചാണ് ഏറെ പരാതികളും ലഭിക്കുന്നതെന്ന് കീവിലെ ഇന്ത്യന്‍ എംബസി അധികൃതര്‍ പറഞ്ഞു. നിരവധി കോളുകളാണ് എംബസിക്ക് ലഭിക്കുന്നത്. എന്നാല്‍ വിദ്യാര്‍ത്ഥികള്‍ ആശങ്കപ്പെടേണ്ടതില്ല എന്നാണ് എംബസി നിര്‍ദേശം നല്‍കിയിരിക്കുന്നത്.
യുക്രൈനിയന്‍ ഇന്റര്‍നാഷനല്‍ എയര്‍ലൈന്‍സ്, എയര്‍ അറേബ്യ, ഫ്‌ളൈ ദുബയ്, ഖത്തര്‍ എയര്‍വേയ്‌സ് എന്നീ കമ്പനികളാണ് ഇപ്പോള്‍ യുക്രൈനില്‍ നിന്ന് സര്‍വീസ് നടത്തുന്നത്. ആവശ്യക്കാര്‍ ഏറിവരുന്ന സാഹചര്യത്തില്‍ എയര്‍ ഇന്ത്യയുടേയും യുക്രൈനിയന്‍ ഇന്റര്‍നാഷനല്‍ എയര്‍ലൈന്‍സിന്റേയും അധിക സര്‍വീസുകള്‍ക്ക് ശ്രമം നടത്തുന്നുണ്ട്. ഇതു സംബന്ധിച്ച ഉറപ്പു ലഭിച്ചാല്‍ എംബസി തന്നെ വിവരമറിയിക്കുമെന്നും അധികൃതര്‍ വ്യക്തമാക്കി.
യുക്രൈനില്‍ നിലനില്‍ക്കുന്ന അനിശ്ചിതത്വത്തിന്റെ പശ്ചാത്തലത്തില്‍ ഇന്ത്യന്‍ വിദ്യാര്‍ത്ഥികള്‍ താല്‍ക്കാലിമായി ഉടന്‍ രാജ്യം വിടണമെന്ന് എംബസി ചൊവ്വാഴ്ച നിര്‍ദേശം നല്‍കിയിരുന്നു.
ദല്‍ഹിയില്‍ പ്രവര്‍ത്തിക്കുന്ന കണ്‍ട്രോള്‍ റൂം നമ്പറുകള്‍: +91 11 23012113, +91 11 23014104, +91 11 23017905. കൂടാതെ 1800118797 ടോള്‍ ഫ്രീ നമ്പറിലും വിളിക്കാം. ഇമെയില്‍: [email protected]
യുക്രൈനിലെ ഇന്ത്യന്‍ എംബസിയില്‍ പ്രവര്‍ത്തിക്കുന്ന ഹെല്‍പ്പ്‌ലൈനുമായി ബന്ധപ്പെടാനുള്ള നമ്പറുകള്‍: +380 997300428 +380 997300483 ഇമെയില്‍: [email protected]
