കണ്ണൂര്‍ - മാതമംഗലത്തെ സി.ഐ.ടി.യു സമരത്തെ ന്യായീകരിച്ച് സി.പി.എം ജില്ലാ സെക്രട്ടറി എം.വി.ജയരാജന്‍ രംഗത്ത്. കടയുടമ പറയുന്നത് പച്ചക്കള്ളമാണെന്നും തൊഴില്‍ നിഷേധത്തിനെതിരെയാണ് സമരം നടന്നതെന്നും ജയരാജന്‍ പറഞ്ഞു.
കണ്ണൂരില്‍ വാര്‍ത്താ സമ്മേളനത്തില്‍ സംസാരിക്കുകയായിരുന്നു അദ്ദേഹം. മാതമംഗലത്തെ സി.ഐ.ടി.യു സമരം തൊഴില്‍ സംരക്ഷണത്തിന് വേണ്ടിയാണ്. മാതമംഗലത്ത് കടപൂട്ടിയത് സി.ഐ.ടി.യു സമരം കൊണ്ടല്ല. പൂട്ടുന്നവരല്ല, തുറപ്പിക്കുന്നവരാണ് സി.ഐ.ടി.യു. കട ഉടമ പ്രശ്‌ന പരിഹാരത്തിന് വന്നിരുന്നു. സി.പി.എം വിരുദ്ധരാണ് ഇല്ലാത്ത കാര്യങ്ങള്‍ പ്രചരിപ്പിക്കുന്നത്. ഗ്രാമങ്ങളില്‍ നന്‍മയുടെ പ്രതീകങ്ങളാണ് ചുമട്ട് തൊഴിലാളികള്‍. പുറത്ത് നിന്ന് തൊഴിലാളികളെ കൊണ്ടു വന്നാല്‍ അറബിക്കടലില്‍ ചാടുകയാണോ വേണ്ടത്. നോക്കുകൂലിക്കെതിരെ ആദ്യം ശബ്ദിച്ചത് സി.ഐ.ടി.യു ആണ്. മാതമംഗലത്ത് നോക്കുകൂലി ചോദിച്ചില്ല, തൊഴിലാണ് ചോദിച്ചത്. ചുമട്ടു തൊഴിലാളിക്ക് ജോലി കൊടുത്ത് പ്രശ്‌നം തീര്‍ക്കണമെന്ന് മാതമംഗലത്തെ കടയുടമയോട് അഭ്യര്‍ത്ഥിക്കുന്നു.- ജയരാജന്‍ പറഞ്ഞു.
സി.ഐ.ടി.യു നേതാവ് പൊലീസിനെതിരെ പറഞ്ഞത് ഒറ്റപ്പെട്ട സംഭവമാണ്. മാതമംഗലത്തേത് പ്രാദേശിക പ്രശ്‌നമാണ്. പ്രശ്‌നം പരിഹരിക്കാന്‍ ശ്രമിക്കും. പ്രശ്‌ന പരിഹാരത്തിനായി കടയുടമ തന്നെ മുന്നോട്ടു വരുന്നുവെന്നാണ് ലഭിക്കുന്ന വിവരം. - ജയരാജന്‍ പറഞ്ഞു.
