ന്യൂദൽഹി- ജവഹർലാൽ നെഹ്‌റു യൂണിവേഴ്‌സിറ്റിയുടെ പുതിയ വൈസ് ചാൻസലറായി ശാന്തിശ്രീ ദുലിപുടി പണ്ഡിറ്റിനെ നിയമിച്ചു. ഈ സ്ഥാനത്ത് എത്തുന്ന ആദ്യ വനിതാ വൈസ് ചാൻസലറാണ് ശാന്തിശ്രീ. നിലവിൽ മഹാരാഷ്ട്രയിലെ സാവിത്രിബായ് ഫൂലെ യൂണിവേഴ്‌സിറ്റിയുടെ വൈസ് ചാൻസലറാണ്. ജെ.എൻ.യുവിലെ പൂർവ്വ വിദ്യാർഥി കൂടിയാണ് ശാന്തിശ്രീ. ശാന്ത്രിശ്രീയുടെ നിയമനത്തിന് രാഷ്ട്രപതി രാം നാഥ് കോവിന്ദ് അംഗീകാരം നൽകി. അഞ്ചു വർഷത്തേക്കാണ് നിയമനം. 1988-ൽ ഗോവ സർവകലാശാലയിൽ അധ്യാപികയായാണ് ശാന്തിശ്രീ ഔദ്യോഗിക ജീവിതം തുടങ്ങിയത്. യൂണിവേഴ്‌സിറ്റി ഗ്രാന്റ്‌സ് കമ്മിഷൻ(യു.ജി.സി.), ഇന്ത്യൻ കൗൺസിൽ ഓഫ് സോഷ്യൽ സയൻസ് റിസേർച്ച്(ഐ.സി.എസ്.എസ്.ആർ.) എന്നിവടങ്ങളിൽ അംഗമായും പ്രവർത്തിച്ചിട്ടുണ്ട്.
