കണ്ണൂര്‍- തനിക്ക് വധ ഭീഷണിയുണ്ടായിരുന്നതായും ആരോ പിന്തടരുന്നുണ്ടെന്നും കൊല്ലപ്പെടുന്നതിന് മുമ്പ് യൂത്ത് കോണ്‍ഗ്രസ് നേതാവ് ഷുഹൈബ് സുഹൃത്തുക്കള്‍ക്ക് അയച്ച ശബ്ദ സന്ദേശം പുറത്തുവന്നു. തന്നെ ആക്രമിക്കാന്‍ കൊലയാളികള്‍ എത്തി. ബൈക്കുകളിലും മറ്റ് വാഹനങ്ങളിലും തന്നെ ചിലര്‍ പിന്തുടരുന്നുണ്ട്. അവര്‍ തന്നെ കൊലപ്പെടുത്തിയേക്കുമെന്നും ഷുഹൈബ് സുഹൃത്തുക്കള്‍ക്ക് അയച്ച വാട്‌സ്ആപ്പ് സന്ദേശത്തില്‍ പറയുന്നു.
അതിനിടെ, ഷുഹൈബ് വധക്കേസില്‍ പോലീസ് അന്വേഷണം തൃപ്തികരമല്ലെന്ന് ഷുഹൈബിന്റെ കുടുംബം ആരോപിച്ചു. തനിക്ക് വധഭീഷണിയുണ്ടെന്ന് നേരത്തെ തന്നെ ഷുഹൈബ് വ്യക്തമാക്കിയിരുന്നതായി പിതാവ് മുഹമ്മദ് പറഞ്ഞു. സി.പി.എമ്മുകാരെ ആക്രമിച്ച കേസില്‍ റിമാന്‍ഡില്‍ കഴിഞ്ഞ് പുറത്തിറങ്ങിയപ്പോഴാണ് ഭീഷണി സന്ദേശങ്ങള്‍ ലഭിച്ചത്. എന്നാല്‍ ഇക്കാര്യത്തില്‍ പോലീസ് ഒന്നും ചെയ്തില്ല. ഷുഹൈബ് കൊല്ലപ്പെട്ട് മണിക്കൂറുകള്‍ കഴിഞ്ഞിട്ടും തങ്ങളുടെ മൊഴിയെടുക്കാന്‍ പോലീസ് എത്തിയിട്ടില്ലെന്നും അദ്ദേഹം ആരോപിച്ചു.
വാഗണ്‍ ആര്‍ കാറിലെത്തിയ നാലംഗ സംഘമാണ് തിങ്കളാഴ്ച രാത്രിയില്‍ തട്ടുകടയില്‍ ഇരുന്ന ഷുഹൈബിനെ ആക്രമിച്ചതെന്ന് നാട്ടുകാര്‍ മൊഴി നല്‍കിയെങ്കിലും പോലീസിന് പ്രതികളെക്കുറിച്ച് സൂചന ലഭിച്ചിട്ടില്ല. മട്ടന്നൂര്‍ സി.ഐയുടെ നേതൃത്വത്തിലാണ് കേസ് അന്വേഷണം നടക്കുന്നത്. ജില്ലാ പോലീസ് ചീഫിന്റെ പ്രത്യേക സംഘവും അന്വേഷണവുമായി രംഗത്തുണ്ട്. പാര്‍ട്ടിയില്‍ മേധാവിത്വം സ്ഥാപിക്കുന്നതിനു വേണ്ടി സി.പി.എം ജില്ലാ നേതൃത്വം പാര്‍ട്ടിക്കുള്ളിലെ ക്രിമിനലുകളെ ക്വട്ടേഷന്‍ സംഘമായി ഉപയോഗിച്ചാണ് കൊലപാതകങ്ങള്‍ നടത്തുന്നതെന്നാണ് കോണ്‍ഗ്രസ് നേതാക്കളുടെ ആരോപണം. നാലംഗ സംഘമാണ് കൊല നടത്തിയതെന്നും ഇവരെ കണ്ടെത്തുന്നതിനുള്ള അന്വേഷണം ഊര്‍ജിതമാക്കിയിട്ടുണ്ടെന്നും പോലീസ് അറിയിച്ചു.
