ബഗ്ദാദ്- ഇറാഖ് പ്രധാനമന്ത്രിയ്ക്ക് നേരെ വധശ്രമം. പ്രധാനമന്ത്രി മുസ്തഫ അല്‍ ഖാദിമിയുടെ ബാഗ്ദാദിലെ വസതിക്ക് നേരെ ഡ്രോണ്‍ ആക്രമണമാണ് ഉണ്ടായത്. സ്‌ഫോടക വസ്തുക്കള്‍ വഹിച്ച ഡ്രോണ്‍ പ്രധാമന്ത്രിയുടെ വസതിയിലേക്ക് ഇടിച്ചിറക്കുകയായിരുന്നു എന്ന് സൈന്യത്തെ ഉദ്ധരിച്ച് വാര്‍ത്താ ഏജന്‍സികള്‍ റിപ്പോര്‍ട്ട് ചെയ്തു. ബാഗ്ദാദിലെ ഗ്രീന്‍ സോണില്‍ നടന്നത് പ്രധാനമന്ത്രിയെ ലക്ഷ്യമിട്ടുള്ള വധശ്രമമാണെന്ന് ഇറാഖ് സൈന്യം പ്രസ്താവനയില്‍ അറിയിച്ചു. പ്രധാനമന്ത്രി സുരക്ഷിതനാണ് എന്നും സൈന്യം വ്യക്തമാക്കി. താന്‍ സുരക്ഷിതനാണ് എന്ന് പ്രധാനമന്ത്രി മുസ്തഫ അല്‍ ഖാദിമിയും അറിയിച്ചു. പ്രധാനമന്ത്രിയുടെ വസതിയ്ക്ക് പുറത്ത് വെടിവയ്പ്പ് ഉണ്ടായതായും റിപ്പോര്‍ട്ടുകളുണ്ട്. ആക്രമണത്തിന്റെ ഉത്തരവാദിത്വം ആരും ഇതുവരെ ഏറ്റെടുത്തിട്ടില്ല. നിരവധി സര്‍ക്കാര്‍ സ്ഥാപനങ്ങളും എംബസികള്‍ ഉള്‍പ്പെടെ നയതന്ത്ര കാര്യാലങ്ങളും പ്രവര്‍ത്തിക്കുന്ന മേഖലയാണ് ബഗ്ദാദിലെ ഗ്രീന്‍ സോണ്‍.
