മലപ്പുറം : എടപ്പാൾ ഗവൺമെന്റ് ഹയർസെക്കൻഡറി സ്‌കൂളിലെ പൊളിറ്റിക്കൽ സയൻസ് അധ്യാപകൻ ബെനഡിക്റ്റിനെ വാടക ക്വാർട്ടേഴ്‌സിൽ മരിച്ച നിലയിൽ കണ്ടെത്തി. കൊല്ലം പുനലൂർ സ്വദേശിയാണ്. മൃതദേഹത്തിന് മൂന്ന് ദിവസത്തെ പഴക്കമുണ്ടെന്നാണ് നിഗമനം. മൃതദേഹത്തിന് സമീപം രക്തം തളംകെട്ടിയിരുന്നു
കഴിഞ്ഞ രണ്ട് വർഷമായി ഹയർസെക്കൻഡറി സ്‌കൂളിൽ സീനിയർ അധ്യാപകനായിരുന്ന ബെനഡിക്റ്റിനായിരുന്നു പ്രിൻസിപ്പിലിന്റെ ചുമതല. സ്‌കൂളിനോട് ചേർന്നുള്ള വാടക ക്വാർട്ടേഴ്‌സിൽ ഒറ്റയ്ക്കായിരുന്നു താമസം. ബെനഡിക്റ്റിനെ കാണാത്തതിനെ തുടർന്ന് സമീപവാസികൾ നടത്തിയ അന്വേഷണത്തിൽ ക്വാർട്ടേഴ്‌സിൽ നിന്ന് ദുർഗന്ധം വമിക്കുന്നത് കണ്ടെത്തി. തുടർന്ന് ചെങ്ങരംകുളം പൊലീസിൽ വിവരം അറിയിക്കുകയായിരുന്നു.
പോലീസ് എത്തി പൂട്ട് തകർത്താണ് അകത്തുകയറിയത്. പരിശോധനയിൽ അഴുകിയ നിലയിൽ മൃതദേഹം കണ്ടെത്തുകയായിരുന്നു. സംഭവത്തിൽ പൊലീസ് കേസെടുത്ത് അന്വേഷണം ആരംഭിച്ചു.
