ന്യൂയോര്‍ക്ക്- ആഗോളതലത്തില്‍ 2050 ഓടെ 500 കോടി ജനങ്ങള്‍ക്ക് കുടിവെള്ള ക്ഷാമം നേരിടുമെന്ന് ഐക്യരാഷ്ട്ര സഭ. കാലാവസ്ഥ വ്യതിയാനം കാരണം വെള്ളപ്പൊക്കം, വരള്‍ച്ച തുടങ്ങിയ പ്രശ്‌നങ്ങളും ലോകമെമ്പാടും വരാനുള്ള സാധ്യത കൂടുതലാണെന്നും യുഎന്‍ ഏജന്‍സിയായ അന്താരാഷ്ട്ര കാലാവസ്ഥാ സംഘടന (ഡബ്ല്യുഎംഒ) അറിയിച്ചു.
ലോകത്തിലെ 360 കോടി ആളുകള്‍ക്ക് 2018 മുതല്‍ തന്നെ വര്‍ഷത്തില്‍ ഒരു മാസം അവരുടെ ആവശ്യത്തിന് വേണ്ട വെള്ളം ലഭിക്കുന്നില്ലെന്ന് ഡബ്ല്യുഎംഒ പുറത്തുവിട്ട 'ദി സ്‌റ്റേറ്റ് ഓഫ് ക്ലൈമറ്റ് സര്‍വീസസ് 2021' റിപ്പോര്‍ട്ടില്‍ പറയുന്നു. 2050 എത്തുമ്പോഴേക്കും ഈ കണക്ക് 500 കോടിയായി ഉയരും. വരാനിരിക്കുന്ന ജലപ്രതിസന്ധിയെ മറികടക്കാന്‍ ദ്രുദഗതിയിലുള്ള നടപടികള്‍ ആഗോളതലത്തില്‍ സ്വീകരിക്കണമെന്നും സംഘടന ചൂണ്ടിക്കാട്ടി. ജല ഉപയോഗം മെച്ചപ്പെടുത്തുക, പുതിയ കാലാവസ്ഥാ നയങ്ങള്‍ പ്രാവര്‍ത്തികമാക്കുക എന്നതിലൂടെ മാത്രമേ കാലാവസ്ഥാ വ്യതിയാനത്തെയും ദുരന്ത സാധ്യതകളെയും മറികടക്കാന്‍ കഴിയുകയുള്ളവെന്നും ഡബ്ല്യുഎംഒ പറയുന്നു.
