അബഹ - അസീർ പ്രവിശ്യയിൽ പെട്ട രിജാൽ അൽമഅ്-അൽഹുബൈൽ റോഡിൽ രണ്ടു കാറുകൾ കൂട്ടിയിടിച്ച് രണ്ടു പേർ മരിച്ചു. മൂന്നു പേർക്ക് പരിക്കേറ്റു. ഇതിൽ രണ്ടു പേരുടെ നില ഗുരുതരമാണ്. രിജാൽ അൽമഅ്-അൽഹുബൈൽ റോഡിൽ ഫായിഅ് പെട്രോൾ ബങ്കിനു സമീപമാണ് അപകടമെന്ന് അസീർ പ്രവിശ്യ റെഡ് ക്രസന്റ് വക്താവ് അഹ്മദ് അൽമഇ പറഞ്ഞു. റെഡ് ക്രസന്റ് പ്രവർത്തകർ രക്ഷാപ്രവർത്തനം നടത്തിയും പ്രാഥമിക ശുശ്രൂഷകൾ നൽകിയും പരിക്കേറ്റവരെ അൽദർബ് ജനറൽ ആശുപത്രിയിലേക്ക് നീക്കി.
മക്കയിലെ മൽകാൻ റോഡിലുണ്ടായ മറ്റൊരു അപകടത്തിൽ അഞ്ചു പേർക്ക് പരിക്കേറ്റു. രണ്ടു കാറുകൾ കൂട്ടിയിടിക്കുകയും ഇക്കൂട്ടത്തിൽ പെട്ട കാറുകളിൽ ഒന്ന് അപകടത്തെ തുടർന്ന് നിയന്ത്രണം വിട്ട് മറിയുകയുമായിരുന്നു. റെഡ് ക്രസന്റിനു കീഴിലെ മൂന്നു ആംബുലൻസ് സംഘങ്ങൾ പ്രാഥമിക ശുശ്രൂഷകൾ നൽകി പരിക്കേറ്റവരെ മക്ക അൽനൂർ സ്‌പെഷ്യലിസ്റ്റ് ആശുപത്രിയിലേക്ക് നീക്കിയതായി മക്ക റെഡ് ക്രസന്റ് വക്താവ് അബ്ദുൽ അസീസ് ബാദോമാൻ അറിയിച്ചു.
