ജറുസലം- ഗാസ ഓപറേഷനു നടുവിലാണ് തങ്ങളെന്നും വ്യോമാക്രമണം ഇനിയും തുടരുമെന്നും ഇസ്രായില്‍ പ്രധാനമന്ത്രി ബെന്യാമിന്‍ നെതന്യാഹു പ്രഖ്യാപിച്ചതിനു പിന്നാലെ ഞായറാഴ്ച രാവിലെ ഗാസയില്‍ രൂക്ഷമായ ഇസ്രായില്‍ ആക്രമണം. ഏഴു ദിവസമായി തുടരുന്ന വ്യോമാക്രമണത്തിനിടെ ഏറ്റവും രൂക്ഷമായ ബോംബാക്രമണത്തില്‍ ഗാസ സിറ്റിയില്‍ 23 പേര്‍ കൊല്ലപ്പെട്ടു. 50 പേര്‍ക്ക് പരിക്കേറ്റു. രണ്ട് പാര്‍പ്പിട സമുച്ചയങ്ങളാണ് ഇസ്രായില്‍ സൈന്യം ബോംബിട്ട് തകര്‍ത്തത്.
ഗാസയിലെ ഓപറേഷന്‍ അവസാനിച്ചിട്ടില്ല, വേണ്ടുവോളം തുടരുമെന്നും ടിവിയിലൂടെ പുറത്തുവിട്ട സന്ദേശത്തില്‍ നെതന്യാഹു പറഞ്ഞതിനു പിന്നാലെയാണ് ശക്തമായ വ്യോമാക്രമണം ഉണ്ടായത്. ഇസ്രായില്‍-ഫലസതീന്‍ സംഘര്‍ഷം ചര്‍ച്ച ചെയ്യാന്‍ ഇന്ന് യുഎന്‍ യോഗം ചേരാനിരിക്കെയാണ് നെതന്യാഹു ഇങ്ങനെ പറഞ്ഞത്. 'ഈ പോരിന് കുറ്റക്കാര്‍ ഞങ്ങളല്ല, ഞങ്ങളെ ആക്രമിക്കുന്നവരാണ്,' അദ്ദേഹം പറഞ്ഞു.
ഇസ്രായില്‍ നടത്തിയ വ്യോമാക്രമണങ്ങളില്‍ ഗസയിലെ ഹമാസിന്റെ നിരവധി സൈനിക കേന്ദ്രങ്ങള്‍ തകര്‍ത്തിട്ടുണ്ടെന്നും നൂറുകണക്കിന് മിസൈല്‍ ലോഞ്ചറുകളും വിശാലമായ ടണല്‍ ശൃംഖലയും തരിപ്പണമാക്കിയിട്ടുണ്ടെന്നും നെതന്യാഹു അവകാശപ്പെട്ടു. ഇതിനു പിന്നാലെ ഗാസയില്‍ ഇസ്രായില്‍ സൈന്യം ആക്രമണം കൂടുതല്‍ ശക്തമാക്കിയതായി രാജ്യാന്തര മാധ്യമങ്ങള്‍ റിപോര്‍ട്ട് ചെയ്യുന്നു.
