ജിദ്ദ- കോൺസൽ ജനറലായി നിയമിതനായി വീണ്ടും ജിദ്ദയിലെത്തിയ മുഹമ്മദ് ഷാഹിദ് ആലത്തിന് ഹജ് സേവന രംഗത്ത് പ്രവർത്തിക്കുന്ന വിവിധ ഇന്ത്യൻ സംഘടനകളുടെ കൂട്ടായ്മയായ ഹജ് വെൽഫെയർ ഫോറം സ്വീകരണം നൽകി. പ്രവാസി ഇന്ത്യൻ സമൂഹത്തിന് സാങ്കേതികവും തൊഴിൽപരവും വ്യക്തിത്വ വികസനപരവുമായ പ്രവർത്തനങ്ങൾ കാഴ്ചവെക്കുന്ന സംഘടനകളെ അദ്ദേഹം അഭിനന്ദിച്ചു. ഹജിനെത്തുന്ന ജനലക്ഷങ്ങൾക്ക് ഉപകാരപ്രദമായ സന്നദ്ധ സേവകരുടെ നിർലോഭമായ സഹകരണം ഏറെ ഹൃദ്യമാണെന്നും സി.ജി പറഞ്ഞു. ജിദ്ദ ഇന്ത്യൻ പൊതുസമൂഹത്തിന്റെ കോൺസുലേറ്റുമായി ബന്ധപ്പെട്ട പ്രവർത്തനങ്ങൾ ടെക്‌നോളജിയുടെ സഹായത്തോടെ അനായാസേന ലഭ്യമാക്കുന്നതിനായുള്ള പദ്ധതികൾ പുരോഗമിക്കുകയാണ്. പ്രവാസി സമൂഹത്തിന്റെ ക്ഷേമത്തിനായി കോൺസുലേറ്റുമായി സഹകരിക്കുന്ന ഹജ് വെൽഫെയർ ഫോറത്തെ അദ്ദേഹം അഭിനന്ദിച്ചു.
ഫോറം ചെയർമാൻ നസീർ വാവാകുഞ്ഞ്, ഉപദേശക സമിതിയംഗം ചെമ്പൻ അബ്ബാസ്, കോ-ഓർഡിനേറ്റർ സി.എച്ച് ബഷീർ എന്നിവരാണ് കോൺസൽ ജനറലിനെ സന്ദർശിച്ചത്. ഹജ് വെൽഫെയർ ഫോറത്തിന്റെ ആശംസകളും സന്നദ്ധ പ്രവർത്തനങ്ങൾക്കുള്ള പിന്തുണയും അറിയിച്ചു കൊണ്ടുള്ള സ്വാഗത പത്രവും സംഘം കോൺസൽ ജനറലിന് സമർപ്പിച്ചു.
