അഹമ്മദാബാദ്- ആര്‍ത്തവത്തിന്റെ പേരില്‍ സ്ത്രീകളെ പൊതു, സ്വകാര്യ ഇടങ്ങളില്‍ നിന്ന് മാറ്റി നിര്‍ത്തുന്നത് അവസാനിപ്പിക്കണമെന്ന് ഗുജറാത്ത് ഹൈക്കോടതി. ശ്രീ സഹജാനന്ദ് ഗേള്‍സ് ഇന്‍സ്റ്റിറ്റിയൂട്ടിലെ ഹോസ്റ്റലില്‍, വിദ്യാര്‍ത്ഥിനികളെ ആര്‍ത്തവമുണ്ടോയെന്ന് പരിശോധിച്ച സംഭവത്തിനെതിരെ നല്‍കിയ പൊതു താത്പര്യ ഹര്‍ജി പരിഗണിക്കവെയാണ് കോടതി നിര്‍ദ്ദേശവുമായി വന്നത്.
ഇതിനായി മാര്‍ഗനിര്‍ദേശങ്ങള്‍ കൊണ്ടുവരണം. ആര്‍ത്തവം കളങ്കമാണെന്നാണ് സമൂഹം വിചാരിച്ചിരിക്കുന്നത്. ആര്‍ത്തവത്തെക്കുറിച്ച് ചര്‍ച്ച ചെയ്യാനുള്ള പരമ്പരാഗതമായ നമ്മുടെ വിമുഖതയാണ് ഇതിന് കാരണം. ആര്‍ത്തവം കാരണം നിരവധി പേര്‍ക്ക് അവരുടെ ദൈനംദിന പ്രവര്‍ത്തികളില്‍ നിന്നുപോലും മാറിനില്‍ക്കേണ്ടിവരുന്നു. പ്രാര്‍ത്ഥിക്കാനോ ദൈവിക ഗ്രന്ഥങ്ങള്‍ സ്പര്‍ശിക്കാനോ അവര്‍ക്ക് അനുവാദമില്ല. നഗരവാസികളായ സ്ത്രീകളെ പൂജാമുറിയിലും ഗ്രാമവാസികളായ സ്ത്രീകളെ അടുക്കളയിലും കയറ്റുന്നില്ലെന്നും കോടതി നിരീക്ഷിച്ചു.
'ആര്‍ത്തവത്തിന്റെ പേരിലുള്ള ഇത്തരം ഭ്രഷ്ടുകള്‍ പെണ്‍കുട്ടികളുടെയും വനിതകളുടെയും വൈകാരിക, മാനസിക നിലകളെ സ്വാധീനിക്കുന്നുണ്ട്.രാജ്യത്തെ 88 ശതമാനം സ്ത്രീകളും കടലാസും ഉണങ്ങിയ ഇലയുമൊക്കെയാണ് രക്തം വലിച്ചെടുക്കാന്‍ ഉപയോഗിക്കുന്നത്. ഫലപ്രദമല്ലാത്ത ഇത്തരം കാര്യങ്ങള്‍ രോഗബാധയ്ക്ക് കാരണമാകും.' കോടതി വ്യക്തമാക്കി
