ന്യൂദല്‍ഹി- ഇന്ത്യക്കാരടക്കം വിവിധ രാജ്യക്കാരെ ഓണ്‍ലൈനിലൂടെ ഭീകര സംഘടനയായ ഐ.എസിലേക്ക് റിക്രൂട്ട് ചെയ്തുവെന്ന് കരുതുന്ന സ്ത്രി ഫിലിപ്പൈന്‍സില്‍ പിടിയില്‍. കരേന്‍ ഐഷ ഹാമിഡണ്‍ എന്ന വനിതയാണു ഫിലിപ്പൈന്‍സിലെ ദേശീയ അന്വേഷണ ബ്യൂറോ (എന്‍ബിഐ)യുടെ പിടിയിലായത്. സമൂഹമാധ്യമങ്ങളിലൂടെ ഐഎസ് ആശയങ്ങള്‍ പ്രചരിപ്പിക്കുകയും യുവാക്കളെ ആകര്‍ഷിക്കുകയുമായിരുന്നു കരേന്‍ ചെയ്തിരുന്നതെന്ന് എന്‍ബിഐ അറിയിച്ചു. ഇന്ത്യയില്‍നിന്ന് ഐ.എസിലേക്ക് പോയവരെ കുറിച്ച് ദേശീയ അന്വേഷണ ഏജന്‍സി (എന്‍.ഐ.എ) നടത്തുന്ന അന്വേഷണത്തില്‍ യുവതിയുടെ അറസ്റ്റ് വലിയ സഹായമാകുമെന്ന് ബന്ധപ്പെട്ട വൃത്തങ്ങള്‍ അറിയിച്ചു. ഇന്ത്യക്കാരെ റിക്രൂട്ട് ചെയ്തതിനെ കുറിച്ച് ചോദ്യം ചെയ്യാന്‍ കരേനെ കസ്റ്റഡിയില്‍ കിട്ടാന്‍ എന്‍.ഐ.എ ഫിലിപ്പൈന്‍സ് അധികൃതരെ സമീപിക്കും. മുംബൈ, തിരുച്ചിറപ്പള്ളി, ഹൈദരാബാദ്, ശ്രീനഗര്‍, കാണ്‍പൂര്‍, സോപോര്‍, കൊല്‍ക്കത്ത, ജയ്പൂര്‍ എന്നിവിടങ്ങളില്‍നിന്നുള്ളവരാണ് കരേനുമായി ബന്ധം പുലര്‍ത്തിയിരുന്നതെന്ന് എന്‍ഐഎ വ്യക്തമാക്കുന്നു.
ഫിലിപ്പൈന്‍സിലെ ഭീകര സംഘടനാ നേതാവായിരുന്ന മുഹമ്മദ് ജാഫര്‍ മക്വിഡിന്റെ വിധവയാണ് കരേന്‍. ഫെയ്‌സ്ബുക്, ടെലഗ്രാം, വാട്‌സാപ്പ് ഗ്രുപ്പുകള്‍ വഴി വിദേശ പോരാളികളെ ഇന്ത്യയില്‍നിന്നും മറ്റു രാജ്യങ്ങളില്‍നിന്നുമായി ഇവര്‍ റിക്രൂട്ട് ചെയ്യുന്നതായി 2016 ലാണ് കണ്ടെത്തിയത്. തുടര്‍ന്ന് വിവിധ രാജ്യങ്ങളിലെ ഏജന്‍സികള്‍ ഇവര്‍ക്കു വേണ്ടിയുള്ള തിരച്ചില്‍ നടത്തിവരികയായിരുന്നു.
കഴിഞ്ഞ വര്‍ഷം കരേന്റെ വിവരങ്ങള്‍ അന്വേഷിച്ച് എന്‍.ഐ.എ ഫിലിപ്പൈന്‍സ് സര്‍ക്കാരിനു കത്തയച്ചിരുന്നു. അവരുടെ ഡിയേഗോയിലുള്ള വിലാസവും ഫോണ്‍ നമ്പറുകളും ഫിലിപ്പൈന്‍സ് അധികൃതര്‍ എന്‍.ഐ.എക്ക് ലഭ്യമാക്കുകയും ചെയ്തിരുന്നു.
ഇന്ത്യയിലെ ഐ.എസ് പ്രചാരകരായിരുന്ന ഇന്ത്യന്‍ ഓയില്‍ കോര്‍പ്പറേഷന്‍ മാനേജര്‍ മുഹമ്മദ് സിറാജുദ്ദീന്‍, എന്‍ജിനീയര്‍ മുഹമ്മദ് നസീര്‍ എന്നിവരെ നേരത്തെ പിടികൂടിയിരുന്നു. തങ്ങളെ റിക്രൂട്ട് ചെയ്തത് കരേന്‍ ആയിരുന്നുവെന്നാണ് ഇവരുടെ മൊഴി.
ഇന്ത്യയിലെ ഐ.എസ് പ്രചാരകരായിരുന്ന ഇന്ത്യന്‍ ഓയില്‍ കോര്‍പ്പറേഷന്‍ മാനേജര്‍ മുഹമ്മദ് സിറാജുദ്ദീന്‍, എന്‍ജിനീയര്‍ മുഹമ്മദ് നസീര്‍ എന്നിവരെ നേരത്തെ പിടികൂടിയിരുന്നു. തങ്ങളെ റിക്രൂട്ട് ചെയ്തത് കരേന്‍ ആയിരുന്നുവെന്നാണ് ഇവരുടെ മൊഴി.
