വെല്ലിംഗ്ടണ്‍- സ്‌കൂള്‍ വിദ്യാര്‍ത്ഥിനികള്‍ക്ക് സാനിട്ടറി പാഡുകള്‍ സൗജന്യമാക്കി ന്യൂസിലാന്‍ഡ്. ആര്‍ത്തവ സമയത്തെ ബുദ്ധിമുട്ടുകള്‍ ഒഴിവാക്കാന്‍ വേണ്ടിയാണ് ഈ നടപടി.
പാഡ് വാങ്ങാന്‍ കഴിയാത്തത് കൊണ്ട് നിരവധി വിദ്യാര്‍ത്ഥിനികളാണ് സ്‌കൂളില്‍ വരാതിരിക്കുന്നത്. ഈ സാഹചര്യം ഒഴിവാക്കാന്‍ വേണ്ടിയാണ് ഈ തീരുമാനമെന്ന് ന്യൂസിലാന്‍ഡ് പ്രധാനമന്ത്രി ജസീന്ത ആര്‍ഡേന്‍ അറിയിച്ചു. മാത്രമല്ല ഈ ഐറ്റം ആഡംബര വസ്തുവാകുന്ന സാഹചര്യം ഒഴിവാകണമെന്നും ജസീന്ത പറഞ്ഞു. ഈ തീരുമാനം ജൂലൈ മുതലാണ് പ്രാബല്യത്തില്‍ വരുന്നത്. വിവിധ മേഖലയിലെ 15 സ്‌കൂളുകളിലാണ് ഈ സംവിധാനം ലഭിക്കുന്നത്.
അതിനുശേഷം രാജ്യത്തിലെ എല്ലാ സ്‌കൂളുകളിലേക്കും ഈ സംവിധാനം വ്യാപിപ്പിക്കും. കണക്കുകള്‍ അനുസരിച്ച് 9 നും 18 നും ഇടയില്‍ പ്രായമുള്ള 9500 കുട്ടികള്‍ ആര്‍ത്തവ ദിനങ്ങളില്‍ സ്‌കൂളില്‍ വരാതെ സ്വന്തം വീടുകളില്‍ കഴിയുന്നുണ്ട്. ഇവര്‍ക്ക് സാനിട്ടറി പാഡ് ലഭിക്കാത്തതിനാലാണ് വീടുകളില്‍ തുടരേണ്ടിവരുന്നത്. ഇത് ഒഴിവാക്കാനാണ് പ്രധാനമന്ത്രി ഇങ്ങനൊരു നടപടിയുമായി മുന്നോട്ട് വന്നിരിക്കുന്നത്.
'
