ലഖ്‌നൗ- മഹാരാഷ്ട്രയില്‍നിന്ന് അന്തര്‍സംസ്ഥാന തൊഴിലാളികളുമായി ഉത്തര്‍പ്രദേശിലേക്ക് പുറപ്പെട്ട പ്രത്യേക ട്രെയിന്‍ വഴി തെറ്റി എത്തിയത് ഒഡീഷയില്‍. മഹാരാഷ്ട്രയില്‍നിന്ന് ഗോരഖ്പൂരിലേക്ക് വ്യാഴാഴ്ച പുറപ്പെട്ട ട്രെയിനാണ് ഒഡീഷയിലെ റൂര്‍ക്കേലയില്‍ എത്തിയത്.
ലോക്കോപൈലറ്റിന് വഴിതെറ്റിയതാകാമെന്നാണ് നിഗമനം. എന്നാല്‍ വിഷയത്തില്‍ ഔദ്യോഗിക വിശദീകരണം നല്‍കാന്‍ റെയില്‍വേ തയ്യാറായിട്ടില്ല.
മുംബൈയില്‍ ഭക്ഷണവും ജോലിയുമില്ലാതെ കുടുങ്ങിയ നൂറ് കണക്കിന് വരുന്ന തൊഴിലാളികളാണ് സ്വന്തം നാടായ യു.പിയിലേക്ക് വ്യാഴാഴ്ച ട്രെയിന്‍ കയറിയത്. എന്നാല്‍ ഇന്ന് രാവിലെ ഉറക്കമുണര്‍ന്ന് ട്രെയിനില്‍നിന്ന് ഇറങ്ങാന്‍ തയ്യാറാകുമ്പോഴാണ് തങ്ങള്‍ എത്തിയത് ഗോരഖ്പൂരിലല്ലെന്നും റൂര്‍ക്കേലയിലാണെന്നും മനസ്സിലായത്.
എവിടെയാണ് തങ്ങളെ എത്തിച്ചതെന്നും എന്തുകൊണ്ടാണ് ഇത് സംഭവിച്ചതെന്നുമുള്ള യാത്രക്കാരുടെ ചോദ്യത്തിന് റെയില്‍വേ നല്‍കിയ റൂട്ടിലൂടെയാണ് ട്രെയിന്‍ സഞ്ചരിച്ചത് എന്നായിരുന്നു അധികൃതരുടെ മറുപടി. ഖോരഖ്പൂരില്‍നിന്ന് 750 കി.മീ ദൂരമുണ്ട് റൂര്‍ക്കേലയിലേക്ക്. യാത്രക്കാരെ തിരിച്ച് ഗോരഖ്പൂരില്‍ എത്തിക്കുമെന്ന് റെയില്‍വേ അറിയിച്ചു.
