ദുബായ്- ഇന്ത്യന്‍ മെഡിക്കല്‍ സംഘത്തെ ഉടന്‍ യു.എ.ഇയിലേക്ക് അയക്കാന്‍ കേന്ദ്രസര്‍ക്കാര്‍ തീരുമാനിച്ചു. മാസ്‌ക് അടക്കം ഏഴു ടണ്‍ വൈദ്യസഹായ വസ്തുക്കള്‍ യു.എ.ഇ ഇന്ത്യയിലേക്കും കയറ്റി അയച്ചു. യു.എ.ഇ വിദേശകാര്യമന്ത്രാലയത്തിന്റെ അഭ്യര്‍ഥന പ്രകാരമാണ് കേന്ദ്രസര്‍ക്കാര്‍ 88 അംഗ മെഡിക്കല്‍ സംഘത്തെ യു.എ.ഇയിലേക്ക് അയക്കുന്നത്.
ഡോക്ടര്‍മാര്‍, നഴ്‌സസുമാര്‍ തുടങ്ങിയവരുള്‍പ്പെടുന്നതാണ് സംഘം. യു.എ.ഇയില്‍നിന്നു അവധിക്കു നാട്ടിലെത്തിയ ആരോഗ്യപ്രവര്‍ത്തകരും സംഘത്തിലുണ്ടെന്നു ദുബായ് ഇന്ത്യന്‍ കോണ്‍സല്‍ ജനറല്‍ വിപുല്‍ പറഞ്ഞു.
ഇന്ത്യയിലേക്കു ഏഴ് ടണ്‍ വൈദ്യ സഹായ വസ്തുക്കളാണ് യു.എ.ഇ കയറ്റി അയച്ചത്. ഇന്ത്യയിലെ 7000 ആരോഗ്യപ്രവര്‍ത്തകര്‍ക്കു ഇതു സഹായകരമാകുമെന്നു യു.എ.ഇ സ്ഥാനപതി അഹ്മദ് റഹ്മാന്‍ അല്‍ ബന്ന വ്യക്തമാക്കി.
