ദമാം - കൊറോണ വ്യാപനം തടയുന്നതിനു നടപ്പാക്കിയ കടുത്ത നിയന്ത്രണങ്ങളുടെ ഫലമായി അന്തരീക്ഷ മലിനീകരണം കുറഞ്ഞതോടെ അൽകോബാറിൽ നിന്ന് ബഹ്‌റൈൻ വ്യക്തമായി ദൃശ്യമാകുന്നു. 20 കിലോമീറ്ററിലേറെ അകലെയുള്ള ബഹ്‌റൈനിലെ കെട്ടിടങ്ങൾ വ്യക്തമായി ദൃശ്യമാകുന്ന ഫോട്ടോകൾ അൽകോബാറിലെ സാമൂഹിക മാധ്യമ ഉപയോക്താക്കൾ പങ്കുവെച്ചു. അറേബ്യൻ ഉൾക്കടലിനപ്പുറം ബഹ്‌റൈനിലെ കെട്ടിടങ്ങൾ വ്യക്തമായി കാണുന്ന ഫോട്ടോകൾ അൽകോബാർ ബീച്ചിൽ നിന്നാണ് പകർത്തിയത്. ലോക് ഡൗൺ ബാധകമാക്കിയതു മൂലം അന്തരീക്ഷ മലിനീകരണവും കാർബൺ ഡയോക്‌സൈഡ് ബഹിർഗമനവും കുറഞ്ഞതാണ് അൽകോബാറിൽ നിന്ന് ഇത്രയും വ്യക്തതയോടെ ബഹ്‌റൈൻ ദൃശ്യമാകാൻ കാരണമെന്ന് സാമൂഹിക മാധ്യമ ഉപയോക്താക്കൾ പറഞ്ഞു.
