ന്യൂയോർക്ക്- കഴിഞ്ഞ പത്തുദിവസത്തിനിടെ കോവിഡ് ബാധിച്ച് മരിച്ചവരുടെ എണ്ണത്തിലുണ്ടായ ക്രമതീതമായ വർധനവ് അമേരിക്കയിൽ ആകെ മരണസംഖ്യ അരലക്ഷത്തിലെത്തിച്ചു. കഴിഞ്ഞ പത്തുദിവസത്തിനുള്ളിലാണ് മരണസംഖ്യയിൽ വൻ വർധനവ് രേഖപ്പെടുത്തിയത്. ആകെ മരിച്ച അരലക്ഷത്തിൽ പകുതിയിലേറെ പേരും മരിച്ചതും കഴിഞ്ഞ പത്തുദിവസത്തിനുള്ളിലാണ്. ഈയൊരു മാസം ശരാശരി രണ്ടായിരം പേരാണ് ഓരോ ദിവസവും മരിച്ചത്. അതേസമയം, ഔദ്യോഗികമായി അരലക്ഷമാണ് മരണം എന്ന് പറയുന്നുണ്ടെങ്കിലും യഥാർത്ഥ കണക്ക് ഇതിലും എത്രയോ ഏറെയായിരിക്കുമെന്നാണ് ആരോഗ്യപ്രവർത്തകർ പറയുന്നത്. പരിശീലനം സിദ്ധിച്ച ആരോഗ്യപ്രവർത്തകരുടെയും പരിശീലന കിറ്റുകളുടെയും അഭാവമാണ് അമേരിക്കയെ ശവപ്പറമ്പാക്കി മാറ്റുന്നതെന്നും ആരോഗ്യപ്രവർത്തകർ പറയുന്നു.
നഴ്‌സിംഗ് ഹോമിലും ആശുപത്രികളിലും മരിച്ചവരുടെ മാത്രം സംഖ്യയാണ് അരലക്ഷം. വീടുകളിൽ മരിച്ചവരുടെ യഥാർത്ഥ കണക്ക് ഇതേവരെ പുറത്തുവന്നിട്ടില്ല. ന്യൂയോർക്കിലാണ് നാൽപത് ശതമാനം മരണവും സംഭവിച്ചത്. ന്യൂ ജഴ്‌സി, മിഷിഗൺ എന്നീ സംസ്ഥാനങ്ങളാണ് തൊട്ടുപിറകിൽ. കോവിഡ് ബാധിച്ച് ഏറ്റവും കൂടുതൽ ആളുകൾ മരിച്ചതും അമേരിക്കയിലാണ്.
