ന്യൂദല്‍ഹി- അര്‍ണബ് ഗോസ്വാമി സോണിയ ഗാന്ധിക്കെതിര നടത്തിയ മതപരവും വ്യക്തിപരവുമായ വിമര്‍ശനം ഭരണഘടനയില്‍ തൊട്ട് സത്യം ചെയ്ത ഏതൊരു പാര്‍ലമെന്റംഗത്തിനുമെതിരാണെന്ന് ചൂണ്ടികാട്ടി ഹൈബി ഈഡന്‍ എം.പി സ്പീക്കര്‍ക്ക് അവകാശ ലംഘന നോട്ടീസ് നല്‍കി.
പത്ര പ്രവര്‍ത്തകനെന്ന്‌സ്വയം പറയുകയും എന്നാല്‍ നാളിതുവരെ പത്രപ്രവര്‍ത്തനത്തിന്റെ ധര്‍മവും തത്വങ്ങളും അംഗീകരിക്കുകയോ ഉള്‍കൊള്ളാന്‍ ശ്രമിക്കുകയോ ചെയ്യാത്തൊരു വ്യക്തിയാണ് അര്‍ണബ് ഗോസ്വാമി.
മാധ്യമ സംവിധാനങ്ങളുടെ സ്വാതന്ത്ര്യവും പ്രതിരോധശേഷിയും ഉപയോഗപ്പെടുത്തി ഏകപക്ഷീയമായി വ്യക്തികളെ ലക്ഷ്യമിടുകയും മതപരവും രാഷ്ട്രീയവുമായി അപകീര്‍ത്തിപ്പെടുത്തുകയും ചെയ്യുകയാണ്. പാര്‍ലമെന്റിലെ തന്നെ മുതിര്‍ന്ന അംഗമായ സോണിയ ഗാന്ധിയെ വ്യക്തിപരമായി അധിക്ഷേപിക്കുക മാത്രമല്ല, പാര്‍ലമെന്റേറിയനെന്ന
വിശിഷ്ട പദവി പോലും അധിക്ഷേപിക്കുന്ന തരത്തിലാണ് അര്‍ണബിന്റെ പരാമര്‍ശം. ഇന്ത്യന്‍ പാര്‍ലമെന്റിനെയും മുഴുവന്‍ അംഗങ്ങളെയും അവരുടെ നിസ്വാര്‍ഥമായ പ്രവര്‍ത്തനത്തെയുമാണ് ഇതിലുടെ വെല്ലുവിളിക്കപ്പെടുന്നതെന്നും എം.പി ചൂണ്ടികാട്ടി.
പാര്‍ലമെന്റംഗങ്ങള്‍ക്കെതിരെ നഗ്‌നമായ നുണകള്‍ പ്രചരിപ്പിക്കുന്നതും പദവിയെ അധിക്ഷേപിക്കുന്നതും തടയുക തന്നെ ചെയ്യണമെന്നും ഭാവിയില്‍ ഇത്തരം വിമര്‍ശനങ്ങള്‍ ഉണ്ടാകാതിരിക്കാന്‍ ആവശ്യമായ നടപടി സ്വീകരിക്കണമെന്നും ഹൈബി ഈഡന്‍ എം.പി ആവശ്യപ്പെട്ടു.
