ബംഗളുരു- ഉയര്‍ന്ന രക്തസമ്മര്‍ദവും ഛര്‍ദിയും കാരണം ബംഗളൂരുവിലെ സ്വകാര്യ ആശുപത്രിയില്‍ പ്രവേശിപ്പിച്ച പി.ഡി.പി ചെയര്‍മാന്‍ അബ്ദുന്നാസര്‍ മഅ്ദനിയെ ഡിസ്ചാര്‍ജ് ചെയ്തു. ഡോക്ടര്‍മാര്‍ പൂര്‍ണ വിശ്രമവും തുടര്‍ ചികിത്സകളും നിര്‍ദേശിച്ചിട്ടുണ്ട്.
മെഡിക്കല്‍ ഡിസ്ചര്‍ജ് സമ്മറി ഉള്‍പ്പെടെയുള്ള വിവരങ്ങള്‍ ധരിപ്പിച്ച് കോടതിയില്‍ ഹാജരാകുന്നതില്‍നിന്ന് ഇളവ് നേടാന്‍ മഅ്ദനിയുടെ അഭിഭാഷകര്‍ അടുത്ത ദിവസം ബംഗളൂരു സ്‌ഫോടനക്കേസ് വിചാരണ നടക്കുന്ന പ്രത്യേക കോടതിയെ സമീപിക്കും.
ഉച്ചയോടെ ആശുപത്രി വിട്ട മഅ്ദനി ബംഗളൂരുവില്‍ തന്നെയുള്ള വസതിയിലാണുള്ളത്. ഭാര്യ സൂഫിയ മഅ്ദനി, അനുജന്‍ സിദ്ധീഖ്, മകന്‍ സലാഹുദീന്‍ അയ്യൂബി, പി.ഡി.പി നേതാവ് മുഹമ്മദ് റജീബ് സഹായികളായ സിദ്ദീഖ്, ഷാനി എന്നിവര്‍ ആശുപത്രിയില്‍ ഒപ്പമുണ്ടായിരിന്നു.
മഅ്ദനിക്ക് ഡോക്ടര്‍മാരുടെ നിര്‍ദേശപ്രകാരം എം.ആര്‍.ഐ സ്‌കാന്‍, സി.ടി സ്‌കാന്‍, ഹൃദയസംബന്ധമായ പരിശോധനകള്‍, വിവിധ രക്തപരിശോധനകള്‍ തുടങ്ങിയവ നടത്തിയിരിന്നു.
30 വര്‍ഷത്തോളമായി അനിയന്ത്രിതമായി തുടരുന്ന രക്തത്തിലെ പഞ്ചസാരയുടെ അളവ് ശരീരത്തിലെ പല അവയവങ്ങളുടെയും പ്രവര്‍ത്തനത്തെ സാരമായി ബാധിച്ചിട്ടുണ്ടെന്ന് പരിശോധനയില്‍ കണ്ടെത്തി.
ഹൃദയസംബന്ധമായ അസുഖങ്ങള്‍ക്കുള്ള ചികിത്സകള്‍ തുടരണമെന്നും പരിശോധനയില്‍ കണ്ടെത്തിയ മറ്റ് അസുഖങ്ങള്‍ക്കുള്ള ചികിത്സകള്‍ നടത്തണമെന്നും ഡോക്ടര്‍മാരുടെ സംഘം നിര്‍ദേശിച്ചു.
