റിയാദ് - നൈപുണ്യങ്ങൾ ഉയർത്തുന്നതിന് സഹായിക്കും വിധം സൗദികളെ ജോലിക്കു വെക്കുന്ന സ്വകാര്യ സ്ഥാപനങ്ങൾക്ക് സാമ്പത്തിക സഹായം നൽകുന്നതിനുള്ള വ്യവസ്ഥകൾ തൊഴിൽ, സാമൂഹിക വികസന മന്ത്രാലയത്തിനു കീഴിലെ മാനവ ശേഷി വികസന നിധി (ഹദഫ്) പരിഷ്‌കരിച്ചു. പദ്ധതി പ്രകാരം ഹദഫ് വേതന വിഹിതം വഹിക്കുന്ന സ്വദേശികളുടെ കൂടിയ വേതനം 10,000 റിയാലിൽ നിന്ന് 15,000 റിയാൽ ആയി ഉയർത്തിയിട്ടുണ്ട്. തൊഴിൽ നഷ്ടപ്പെട്ട്
90 ദിവസക്കാലമെങ്കിലും പിന്നിട്ടവരെ മാത്രമേ പദ്ധതി ഗുണഭോക്താക്കളായി പരിഗണിക്കുകയുള്ളൂ എന്ന വ്യവസ്ഥയും റദ്ദാക്കിയിട്ടുണ്ട്. ഇതനുസരിച്ച് പദ്ധതി പ്രകാരം പരസ്യപ്പെടുത്തുന്ന തൊഴിലവസരങ്ങൾക്ക് ഏതു സമയത്തും അപേക്ഷ നൽകുന്നതിന് ഉദ്യോഗാർഥികൾക്ക് സാധിക്കും. എന്നാൽ പുതിയ തൊഴിൽ തേടുന്നത് ആദ്യം ജോലി ചെയ്തിരുന്ന അതേ ഉടമയുടെ ഉടമസ്ഥതയിലുള്ള സ്ഥാപനങ്ങളിലായിരിക്കരുതെന്ന് വ്യവസ്ഥയുണ്ട്.
വ്യത്യസ്ത പ്രവിശ്യകളിലെ ചേംബർ ഓഫ് കൊമേഴ്‌സുകളുമായി ചേർന്ന് തൊഴിൽ വിപണിയിലെ ഏതാനും മേഖലകളെ പങ്കെടുപ്പിച്ച് ഹദഫ് ശിൽപശാലകൾ സംഘടിപ്പിച്ചതിന്റെയും ഹദഫ് ശാഖകളുടെ അഭിപ്രായം തേടിയതിന്റെയും വ്യവസായികളുടെയും പദ്ധതി ഗുണഭോക്താക്കളുടെയും അഭിപ്രായ, നിർദേശങ്ങൾ സ്വരൂപിച്ചതിന്റെയും ഫലമായാണ് ധനസഹായ വ്യവസ്ഥകൾ പരിഷ്‌കരിച്ചത്. തൊഴിൽ വിപണിയിൽ സ്വദേശികളുടെ പങ്കാളിത്തം വർധിപ്പിക്കുന്നതിനും തൊഴിൽ ധനസഹായ പദ്ധതി സൗദി യുവതീയുവാക്കൾക്ക് പ്രയോജനപ്പെടുന്നതിനും സൗദിവൽക്കരണത്തിനും മാനവശേഷിയിൽ നിക്ഷേപം നടത്തുന്നതിനും സ്വകാര്യ സ്ഥാപനങ്ങളെ പ്രോത്സാഹിപ്പിക്കുന്നതിനുമാണ് ഹദഫ് ശ്രമിക്കുന്നത്.
പദ്ധതി പ്രകാരം സ്വകാര്യ മേഖലയിൽ ജോലി ചെയ്യുന്ന സൗദികളുടെ വേതനത്തിന്റെ നിശ്ചിത വിഹിതമാണ് ഹദഫ് വഹിക്കുന്നത്. ആകെ 36 മാസമാണ് സഹായം നൽകുക. ആദ്യ വർഷം സൗദികളുടെ വേതനത്തിന്റെ 30 ശതമാനവും രണ്ടാം വർഷം 20 ശതമാനവും മൂന്നാം വർഷം 10 ശതമാനവുമാണ് ഹദഫിൽ നിന്ന് വിതരണം ചെയ്യുക. വനിതകളെയും വികലാംഗരെയും ജോലിക്കു വെക്കുന്നതിനും പ്രധാന നഗരങ്ങൾക്ക് പുറത്തുള്ള പ്രദേശങ്ങളിലെയും ജനസാന്ദ്രത കുറഞ്ഞ പ്രദേശങ്ങളിലെയും സ്ഥാപനങ്ങളിൽ ജോലിക്കു വെക്കുന്നതിനും അധിക ധനസഹായം നൽകും. പദ്ധതി പ്രയോജനപ്പെടുത്തി 50 ഉം അതിൽ കുറവും ജീവനക്കാരുള്ള സ്ഥാപനങ്ങളിൽ പുതുതായി സൗദികളെ ജോലിക്കു വെക്കുന്നതിനും അധിക ധനസഹായം ലഭിക്കും. പദ്ധതി പ്രയോജനപ്പെടുത്തുന്നിന് സ്വകാര്യ സ്ഥാപനങ്ങൾ താഖാത്ത് പോർട്ടലിൽ രജിസ്റ്റർ ചെയ്ത് തൊഴിൽ ധനസഹായ പദ്ധതി അക്കൗണ്ട് ആക്ടിവേറ്റ് ചെയ്ത് തൊഴിലവസരങ്ങളുമായി ബന്ധപ്പെട്ട വിവരങ്ങൾ നൽകുകയാണ് വേണ്ടത്. പോർട്ടലിൽ പരസ്യപ്പെടുത്തുന്ന തൊഴിലവസരങ്ങൾ പ്രയോജനപ്പെടുത്തുന്നതിന് ഉദ്യോഗാർഥികൾ മുന്നോട്ടു വരുന്ന പക്ഷം നിയമന നടപടികൾ പൂർത്തിയാക്കും. ഇതോടെ ധനസഹായ പദ്ധതിയിൽ സ്ഥാപനത്തെ ഉൾപ്പെടുത്തുകയാണ് ചെയ്യുക.
