തിരൂരങ്ങാടി- കുളിക്കുന്നതിനിടെ തോട്ടിലെ ചുഴിയിൽപ്പെട്ട് യുവാവ് മരിച്ചു. മൂന്നിയൂർ പടിക്കൽ ആറങ്ങാട് പറമ്പ് സ്വദേശി പരേതനായ പുതിയേടത്ത് ഉമ്മറിന്റെ മകൻ ഹബീബ് റഹ്മാനാ (40) ണ് മരിച്ചത്. ഇന്നലെ രാവിലെ പതിനൊന്ന് മണിയോടെയായിരുന്നു സംഭവം.
സുഹൃത്തുക്കളുമൊത്ത് പടിക്കൽ കിഴക്കൻ തോട്ടിൽ കുളിക്കുന്നതിനിടെ ചുഴിയിൽപ്പെടുകയായിരുന്നു. താഴ്ച്ചയിലേക്ക് മറിഞ്ഞ ഹബീബ് റഹ്മാനെ ഉടനെ പുറത്തെടുത്തെങ്കിലും ജീവൻ രക്ഷിക്കാനായില്ല. നാല് മാസം മുമ്പാണ് ഹബീബ് ഒമാനിൽ നിന്നും അവധിക്ക് നാട്ടിലെത്തിയത്. അലീമയാണ് മാതാവ്. ഭാര്യ: അസ്മാബി, മക്കൾ: മുക്താർ, അഫി, റിഫ ഫാത്തിമ, സഹോദരങ്ങൾ: അബ്ദുൽ നാസർ (ഒമാൻ), ശുഹൈബ് (മദീന). തിരൂരങ്ങാടി താലൂക്ക് ആശുപത്രിയിൽ സൂക്ഷിച്ചിരിക്കുന്ന മൃതദേഹം പോസ്റ്റ് മോർട്ടത്തിന് ശേഷം ചൊവ്വാഴ്ച രാവിലെ എട്ട് മണിക്ക് പടിക്കൽ ജമുഅത്ത് പള്ളി ഖബർസ്ഥാനിൽ മറവ് ചെയ്യും.
