ന്യൂദല്‍ഹി- ത്രിപുര സര്‍വകലാശാല വൈസ് ചാന്‍സലര്‍ എബിവിപിയുടെ പതാക ഉയര്‍ത്തിയത് വിവാദത്തില്‍.
ജൂലൈ 10ന് ക്യാമ്പസില്‍ നടന്ന ഒരു പരിപാടിയിലാണ് വൈസ് ചാന്‍സലര്‍ വിജയകുമാര്‍ ലക്ഷ്മികാന്ത് എബിവിപിയുടെ പതാക ഉയര്‍ത്തിയത്. എബിവിപി സാമൂഹിക സാംസ്‌കാരിക സംഘടനയാണെന്നും സംഭവത്തില്‍ രാഷ്ട്രീയ ബന്ധമില്ലെന്നുമാണ് വിജയകുമാര്‍ വിശദീകരിച്ചത്. പരിപാടിക്ക് ക്ഷണിച്ചതിനെ തുടര്‍ന്നാണ് താന്‍ അവിടെ പോയത്. എബിവിപി ഒരു ദേശവിരുദ്ധ സംഘടനയോ തീവ്രവാദ സംഘടനയോ അല്ല. അതൊരു സാമൂഹിക സാംസ്‌കാരിക സംഘടനയാണ്. അവരുടെ പരിപാടിയില്‍ താന്‍ പങ്കെടുത്തതില്‍ രാഷ്ട്രീയ ബന്ധമൊന്നുമില്ല'. സ്വാമി വിവേകാനന്ദന്റെ ഷിക്കാഗോ പ്രസംഗവുമായി ബന്ധപ്പെട്ടാണ് പരിപാടി സംഘടിപ്പിച്ചതെന്നും പ്രിന്‍സിപ്പള്‍ മാധ്യമങ്ങളോട് പറഞ്ഞു.ഇന്ത്യയിലുള്ള നിരവധി സംഘടനകളുമായി തനിക്ക് ബന്ധമുണ്ട്. വി.സി.എന്ന നിലയില്‍ ക്യാമ്പസില്‍ നടക്കുന്ന ഒരു പരിപാടിയില്‍ പങ്കെടുക്കുന്നതില്‍ തെറ്റില്ലെന്നും അദ്ദേഹം പറഞ്ഞു.
