ന്യൂദല്‍ഹി-ഗുഡ്ഗാവ് മെട്രോ സ്‌റ്റേഷനില്‍ വച്ച് യുവതിയെ അപമാനിക്കാന്‍ ശ്രമിച്ച യുവാവിനെ പൊലീസ് അറസ്റ്റു ചെയ്തു. മെട്രോ സ്‌റ്റേഷനിലെ എസ്‌കലേറ്ററില്‍ വച്ചാണ് യുവാവ് യുവതിയുടെ പിന്നില്‍ നിന്ന് സ്വയംഭോഗം ചെയ്യാന്‍ ശ്രമിച്ചത്. ജൂണ്‍ 14ന് നടന്ന സംഭവത്തെക്കുറിച്ച് യുവതി സോഷ്യല്‍ മീഡിയയിലൂടെ അറിയിച്ചതോടെയാണ് പൊലീസ് നടപടി സ്വീകരിച്ചത്. ഡല്‍ഹി മുഖ്യമന്ത്രി അരവിന്ദ് കെജ്‌രിവാള്‍, പ്രധാനമന്ത്രി നരേന്ദ്രമോഡി എന്നിവരെ ടാഗ് ചെയ്തായിരുന്നു യുവതി സംഭവം ട്വീറ്റ് ചെയ്തത്. യുവാവിനെതിരെ യുവതി രംഗത്തെത്തിയപ്പോള്‍ സംഭവം കണ്ടുനിന്ന ആരും പ്രതികരിച്ചില്ലെന്നും യുവതി ആരോപിച്ചു. സ്ത്രീകള്‍ക്ക് സൗജന്യ യാത്ര ഒരുക്കുന്നതിന് മുമ്പ് മതിയായ സുരക്ഷ നല്‍കണമെന്നും യുവതി ആവശ്യപ്പെട്ടിരുന്നു.
സുഹൃത്തിനെ കാണാന്‍ ഗുഡ്ഗാവിലെത്തിയതായിരുന്നു യുവതി. മെട്രോ സ്‌റ്റേഷനിലെ ഒന്നാം നിലയിലുള്ള വസ്ത്രശാലയില്‍ ക.യറുമ്പോഴായിരുന്നു സംഭവം. എസ്‌കലേറ്ററിലൂടെ താഴേക്ക് ഇറങ്ങുമ്പോള്‍ തന്റെ പിന്‍ഭാഗത്ത് അസ്വഭാവികമായി എന്തോ സ്പര്‍ശിച്ചതായി യുവതിക്കു തോന്നി. തിരിഞ്ഞുനോക്കിയപ്പോള്‍ കണ്ട കാഴ്ച അവരെ ഞെട്ടിച്ചു. ഒരു യുവാവ് തന്റെ പിന്‍ഭാഗത്തു ചേര്‍ന്ന്‌നിന്ന് സ്വയംഭോഗം ചെയ്യുകയാണ്. ഭയന്നുവിറച്ചുപോയ താന്‍ അയാളെ എതിര്‍ത്തുവെന്നും യുവതി പറയുന്നു. ഈ സമയം അയാള്‍ തന്റെ ദേഹത്തേക്കാണ് ലക്ഷ്യം വയ്ക്കുന്നതെന്നും ഒപ്പം അസഭ്യം പറയുന്നതും യുവതിക്ക് മനസിലായി. തുടര്‍ന്ന് യുവതി അയാളെ അടിച്ചു.
എന്നാല്‍ യുവതിക്ക് നേരെ അസഭ്യവര്‍ഷം നടത്തികൊണ്ട് വീണ്ടും അയാള്‍ സ്വയംഭോഗം ചെയ്തു കൊണ്ടിരുന്നു. തുടര്‍ന്ന് ഓടിരക്ഷപ്പെട്ടു. ഈ സമയം സഹായത്തിന് താന്‍ വിളിച്ചുവെങ്കിലും ആരും എത്തിയില്ലെന്നും അവിടെയുണ്ടായിരുന്ന യാത്രക്കാര്‍ എല്ലാം കാഴ്ച കണ്ടുനിന്നുവെന്നും യുവതി പറയുന്നു. സംഭവത്തില്‍ ഫേസ്ബുക്ക് വഴി പൊലീസിനോട് പരാതിപ്പെട്ടുവെങ്കിലും ഒരു പ്രതികരണവും ലഭിച്ചില്ല. ഇതോടെ തന്നെ ഉപദ്രവിച്ചയാളെ തിരിച്ചറിയാന്‍ സിസിടിവി ദൃശ്യങ്ങള്‍ ആവശ്യപ്പെട്ട് ഡി.എം.ആര്‍.സിക്ക് പരാതി നല്‍കിയിരുന്നു
