ഹജ്- ആഭ്യന്തര ഹജ് തീർഥാടകരുടെ ചെറിയ കുട്ടികളെ ഹജ് ദിവസങ്ങളിൽ മക്കയിൽ ക്രഷെകളുടെയും നഴ്‌സറികളുടെയും സംരക്ഷണത്തിൽ ഏൽപിക്കുന്നതിനുള്ള നിരക്കുകൾ ഹജ്, ഉംറ മന്ത്രാലയം നിശ്ചയിച്ചു. സീസൺ ക്രഷെ, നഴ്‌സറി പദ്ധതി പ്രയോജനപ്പെടുത്താൻ ആഗ്രഹിക്കുന്ന ആഭ്യന്തര ഹജ് സർവീസ് കമ്പനികളിൽ നിന്നും സ്ഥാപനങ്ങളിൽ നിന്നും ഹജ്, ഉംറ മന്ത്രാലയം അപേക്ഷകൾ സ്വീകരിക്കാൻ തുടങ്ങിയിട്ടുണ്ട്.
വികലാംഗരായ കുട്ടികളെ ക്രഷെകളുടെയും നഴ്‌സറികളുടെയും പരിചരണത്തിലാക്കുന്നതിന് 3,000 റിയാൽ വീതവും സാധാരണ കുട്ടികളെ ശിശു പരിചരണ കേന്ദ്രങ്ങളിൽ ഏൽപിക്കുന്നതിന് 2,500 റിയാൽ വീതവുമാണ് നിരക്ക് നൽകേണ്ടത്. കുട്ടികളെ ശിശു പരിചരണ കേന്ദ്രങ്ങളിലും തിരിച്ചും എത്തിക്കേണ്ടത് ഹജ് സർവീസ് കമ്പനികളുടെ ചുമതലയാണ്. ഹജ് ദിവസങ്ങളിൽ കുട്ടികളുടെ സംരക്ഷണ ചുമതല മക്കയിലെ ക്രഷെകളെയും നഴ്‌സറികളെയും ഏൽപിച്ച് പ്രയാസങ്ങളൊന്നും കൂടാതെ ഹജ് നിർവഹിക്കാൻ തീർഥാടകർക്ക് അവസരമൊരുക്കുന്നതിന് ലക്ഷ്യമിട്ടാണ് ഈ പദ്ധതി ഹജ്, ഉംറ മന്ത്രാലയം നടപ്പാക്കുന്നത്.
