ശ്രീനഗര്- ജമ്മു കശ്മീരിലെ അനന്ത്നാഗില് ഭീകരര് നടത്തിയ ആക്രമണത്തില് അഞ്ച് സി.ആര്.പി.എഫ് ജവാന്മാര്ക്കു വീരമൃത്യു. രണ്ടു പേര്ക്കു പരുക്കേറ്റു. ആക്രമണം നടത്തിയ രണ്ടു ഭീകരില് ഒരാളെ സുരക്ഷാസേന വധിച്ചു. അനന്ത്നാഗ് ബസ് സ്റ്റാന്ഡിനു സമീപം കെ.പി ചൗക്കിലാണ് ആക്രമണം.
പട്രോളിങ് നടത്തിക്കൊണ്ടിരുന്ന സൈനികരെ ഗ്രനേഡുകള് ഉപയോഗിച്ച് ഭീകരര് ആക്രമിക്കുകയായിരുന്നു. തുടര്ന്നു സൈന്യം പ്രത്യാക്രമണം നടത്തി. ഭീകരരും സൈനികരും തമ്മിലുള്ള ഏറ്റുമുട്ടല് രാത്രിയും തുടരുകയാണ്. അനന്ത്നാഗ് സ്റ്റേഷന് ഹൗസ് ഓഫിസര് അര്ഷദ് അഹമ്മദിനും ഒരു സിവിലിയനുമാണ് പരിക്കേറ്റത്.
40 സി.ആര്.പി.എഫ് ജവാന്മാര് വീരമൃത്യു വരിക്കാനിടയായ പുല്വാമ ഭീകരാക്രമണത്തിന്റെ ഞെട്ടലില്നിന്ന് രാജ്യം മുക്തമാകുന്നതിന് മുമ്പാണ് വീണ്ടുമൊരു ആക്രമണം. പുല്വാമ ഭീകരാക്രമണത്തിന് പിന്നാലെ ഇന്ത്യയും പാക്കിസ്ഥാനും തമ്മിലുള്ള ബന്ധം വഷളായിരുന്നു. ബലാക്കോട്ടിലെ ജെയ്ശെ മുഹമ്മദ് ഭീകര ക്യാമ്പുകള്ക്കുനേരെ ഇന്ത്യന് വ്യോമസേന മിന്നലാക്രമണം നടത്തുകയും ചെയ്തിരുന്നു.
