ഹായിൽ - കളഞ്ഞുകിട്ടിയ ഒരു ലക്ഷത്തിലേറെ റിയാൽ ഉടമയെ കണ്ടെത്തി സൗദി യുവാവ് തിരിച്ചുനൽകി. ഹായിൽ റിംഗ് റോഡിലെ പെട്രോൾ ബങ്കിൽ നിന്നാണ് തനിക്ക് 1,11,000 റിയാലും അൽറാജ്ഹി ബാങ്ക് അനുവദിച്ച വിസ പ്ലാറ്റിനം ക്രെഡിറ്റ് കാർഡും സൂക്ഷിച്ച പഴ്‌സ് വീണുകിട്ടിയതെന്ന് സൗദി യുവാവ് മിശ്അൽ അൽരിമാലി അൽശമ്മരി പറഞ്ഞു.
ഉടമയെ കണ്ടെത്തുന്നതിനായി പഴ്‌സ് വീണുകിട്ടിയ കാര്യം താൻ സാമൂഹിക മാധ്യമങ്ങളിലൂടെ പരസ്യം ചെയ്തു. എന്നാൽ ഉടമയെ കണ്ടെത്തുന്നതിന് സാധിച്ചില്ല.
ഇതേ തുടർന്ന് പോലീസ് സ്റ്റേഷനിൽ എത്തി വിവരം അറിയിക്കുകയായിരുന്നു. പോലീസുകാർ പ്രാഥമികാന്വേഷണ റിപ്പോർട്ട് തയാറാക്കി തന്നെ അൽറാജ്ഹി ബാങ്കിലേക്ക് അയച്ചു. ബാങ്ക് അധികൃതർ ക്രെഡിറ്റ് കാർഡ് ഉടമയുമായി ബന്ധപ്പെടുന്നതിനുള്ള നമ്പർ തന്നു. ഇതിൽ ബന്ധപ്പെട്ടതു പ്രകാരം ഉടമ ബാങ്കിലെത്തി. പണം നഷ്ടപ്പെട്ടിട്ടുണ്ടെന്നും എന്നാൽ എവിടെ വെച്ചാണ് ഇതു കളഞ്ഞുപോയതെന്നു തനിക്കറിയില്ലെന്നും ഉടമ പറഞ്ഞു. യഥാർഥ ഉടമയാണെന്ന് ഉറപ്പുവരുത്തി പണവും ക്രെഡിറ്റ് കാർഡും അടങ്ങിയ പഴ്‌സ് തിരിച്ചുനൽകുകയായിരുന്നെന്നും മിശ്അൽ അൽരിമാലി അൽശമ്മരി പറഞ്ഞു.
