ന്യൂദല്‍ഹി- ബിഎസ്പി നേതാവ് മായാവതിയെ കോണ്‍ഗ്രസും സമാജ് വാദി പാര്‍ട്ടിയും ഉപയോഗപ്പെടുത്തുകയാണെന്ന പ്രധാനമന്ത്രി നരേന്ദ്ര മോഡിയുടെ പരാമര്‍ശത്തിനെതിരെ ശക്തമായ ഐക്യ സന്ദേശവുമായി മായാവതി. നാളെ വോട്ടെടുപ്പു നടക്കുന്ന യുപിയിലെ അമേത്തിയിലും റായ്ബറേലിയിലും എസ്,പി-ബിഎസ്പി നേതൃത്വത്തിലുള്ള മഹാസഖ്യത്തിന്റെ ഓരോ വോട്ടും കോണ്‍ഗ്രസിനു തന്നെ ലഭിക്കുമെന്ന് മായാവതി പ്രതികരിച്ചു. കോണ്‍ഗ്രസിനു വോട്ടു ചെയ്യണമെന്ന് തന്റെ പാര്‍ട്ടി അണികളോട് അവര്‍ അഭ്യര്‍ത്ഥിക്കുകയും ചെയ്തു.
കോണ്‍ഗ്രസ് അധ്യക്ഷന്‍ മത്സരിക്കുന്ന അമേത്തിയിലും സോണിയാ ഗാന്ധി മത്സരിക്കുന്ന റായ്് ബറേലിയിലും സഖ്യത്തിന് സ്ഥാനാര്‍ത്ഥികളില്ല. ഏതു സാഹചര്യമുണ്ടായാലും ഞങ്ങളുടെ സഖ്യത്തിന്റെ ഓരോ വോട്ടുകളുംല കോണ്‍ഗ്രസ് നേതാക്കള്‍ക്കു ലഭിക്കുമെന്ന് വിശ്വാസമുണ്ട്- മായാവതി പറഞ്ഞു.
റായ് ബറേലിയില്‍ പ്രചാരണത്തിനിടെ കോണ്‍ഗ്രസ് നേതാവ് പ്രിയങ്ക ഗാന്ധി സമാജ് വാദി പാര്‍ട്ടി പ്രവര്‍ത്തകരെ കണ്ടിരുന്നു. ഇതിനു പിന്നാലെയാണ് മായാവതിക്കു പിന്നില്‍ നിന്ന് ഈ രണ്ടു പാര്‍ട്ടികളും കൈകോര്‍ക്കുകയാണെന്ന് മോഡി ആക്ഷേപിച്ചത്. ഈ കളി ബെഹന്‍ജിക്ക് തിരിച്ചറിയാന്‍ കഴിയുന്നില്ലെന്നും മോഡി പറഞ്ഞിരുന്നു.
ബിഎസ്പിയെ സംബന്ധിച്ചിടത്തോളം കോണ്‍ഗ്രസും ബിജെപിയും ഒരു പോലെയാണ്. കോണ്‍ഗ്രസുമായി ബിഎസ്പിക്ക് സഖ്യമില്ല. എന്നാല്‍ ബിജെപിയെ പരാജയപ്പെടുത്താന്‍ അമേത്തിയിലും റായ്ബറേലിയിലും കോണ്‍ഗ്രസിനെ പിന്തുണയ്ക്കുമെന്നും മായാവതി പറഞ്ഞു.
