റിയാദ് - സ്വകാര്യ മേഖലാ സ്ഥാപനങ്ങളിൽ സൗദിവൽക്കരണം ഏറ്റവും കൂടുതൽ ക്ലറിക്കൽ തസ്തികകളിലാണെന്ന് ഔദ്യോഗിക കണക്കുകൾ വ്യക്തമാക്കുന്നു. ഈ മേഖലയിൽ സൗദിവൽക്കരണം 88.5 ശതമാനമാണ്. സൗദിവൽക്കരണം ഏറ്റവും കുറവ് കൃഷി,
കാലിവളർത്തൽ, മത്സ്യബന്ധന മേഖലയിലാണ്. ഈ മേഖലയിൽ സൗദിവൽക്കരണം 5.1 ശതമാനം മാത്രമാണ്. മാനേജർ, ബിസിനസ് മാനേജർ മേഖലയാണ് സൗദിവൽക്കരണത്തിൽ രണ്ടാം സ്ഥാനത്ത്. ഈ മേഖലയിൽ സ്വദേശിവൽക്കരണം 71.7 ശതമാനമാണ്. സ്വകാര്യ മേഖലയിൽ ഏറ്റവും കൂടുതൽ സൗദികൾ ജോലി ചെയ്യുന്നതും ക്ലറിക്കൽ തസ്തികകളിലാണ്.
കഴിഞ്ഞ വർഷം അവസാന പാദത്തിലെ കണക്കുകൾ പ്രകാരം 5,16,949 പേർ ഈ മേഖലയിൽ ജോലി ചെയ്യുന്നു. സ്വകാര്യ മേഖലയിലെ ആകെ സൗദി ജീവനക്കാരിൽ 26.8 ശതമാനവും ഈ മേഖലയിലാണ്. കഴിഞ്ഞ വർഷം അവസാന പാദത്തിലെ കണക്കുകൾ പ്രകാരം സ്വകാര്യ മേഖലയിൽ 19.3 ലക്ഷം സൗദികൾ ജോലി ചെയ്യുന്നുണ്ട്. സ്വകാര്യ മേഖലയിൽ സൗദിവൽക്കരണം 21.8 ശതമാനമായി ഉയർന്നിട്ടുണ്ട്. 2016 അവസാന പാദത്തിൽ സൗദിവൽക്കരണം 18.1 ശതമാനമായിരുന്നു.
ക്ലറിക്കൽ മേഖലയിൽ ഏതാനും തസ്തികകൾ സൗദികൾക്കു മാത്രമായി തൊഴിൽ, സാമൂഹിക വികസന മന്ത്രാലയം പരിമിതപ്പെടുത്തിയിട്ടുണ്ട്. പേഴ്‌സണൽ അഫയേഴ്‌സ് ക്ലർക്ക്, എംപ്ലോയ്‌മെന്റ് ക്ലർക്ക്, എംപ്ലോയീസ് അഫയേഴ്‌സ് ക്ലർക്ക്, ഡ്യൂട്ടി റൈറ്റർ, ജനറൽ റിസപ്ഷൻ ക്ലർക്ക്, ഹോട്ടൽ റിസപ്ഷൻ ക്ലർക്ക്, പേഷ്യന്റ് റിസപ്ഷൻ ക്ലർക്ക്, കംപ്ലയിന്റ്‌സ് റൈറ്റർ എന്നിവ അടക്കമുള്ള തൊഴിലുകളാണ് സൗദികൾക്കു മാത്രമായി പരിമിതപ്പെടുത്തിയിരിക്കുന്നത്.
സെയിൽസ് മേഖലയിൽ സൗദിവൽക്കരണം 49.6 ശതമാനവും ശാസ്ത്ര, സാങ്കേതിക, മാനവിക സ്‌പെഷ്യലിസ്റ്റ് മേഖലയിൽ സ്വദേശിവൽക്കരണം 39.4 ശതമാനവുമാണ്. ശാസ്ത്ര, സാങ്കേതിക, മാനവിക ടെക്‌നീഷ്യൻ മേഖലയിൽ 32.1 ശതമാനവും വ്യവസായ, കെമിക്കൽസ്, ഭക്ഷ്യവസ്തു വ്യവസായ തൊഴിൽ മേഖലയിൽ 17.4 ശതമാനവും എൻജിനീയറിംഗ് മേഖലയിൽ 9.6 ശതമാനവും സേവന മേഖലയിൽ 9.1 ശതമാനവും കൃഷി, കാലിവളർത്തൽ, മത്സ്യബന്ധന മേഖലയിൽ 5.1 ശതമാനവും മറ്റു തൊഴിൽ മേഖലകളിൽ 9.6 ശതമാനവുമാണ് സൗദിവൽക്കരണം.
ഏറ്റവും കൂടുതൽ സൗദികൾ ജോലി ചെയ്യുന്നത് ക്ലറിക്കൽ തസ്തികകളിലാണ്. ഈ മേഖലയിൽ 5,16,949 സൗദികൾ ജോലി ചെയ്യുന്നുണ്ട്. സേവന മേഖലയിൽ 3,38,463 പേരും സൈയിൽസ് മേഖലയിൽ 2,61,469 പേരും ജോലി ചെയ്യുന്നു. മാനേജർ, ബിസിനസ് മാനേജർ തസ്തികകളിൽ 1,55,820 സ്വദേശികളും ശാസ്ത്ര, സാങ്കേതിക, മാനവിക സ്‌പെഷ്യലിസ്റ്റ് മേഖലയിൽ 1,75,687 സൗദികളും ശാസ്ത്ര, സാങ്കേതിക, മാനവിക ടെക്‌നീഷ്യൻ മേഖലയിൽ 2,11,801 പേരും വ്യവസായ, കെമിക്കൽസ്, ഭക്ഷ്യവസ്തു വ്യവസായ തൊഴിൽ മേഖലയിൽ 31,701 പേരും എൻജിനീയറിംഗ് മേഖലയിൽ 2,02,274 പേരും കൃഷി, കാലിവളർത്തൽ, മത്സ്യബന്ധന മേഖലയിൽ 4,105 സൗദികളും മറ്റു തൊഴിലുകളിൽ 32,913 സ്വദേശികളും ജോലി ചെയ്യുന്നു.
