ന്യൂദൽഹി- കോൺഗ്രസ് ദേശീയ പ്രസിഡന്റ് രാഹുൽ ഗാന്ധി ലോക്‌സഭ തെരഞ്ഞെടുപ്പിൽ വയനാട്ടിൽ മത്സരിക്കും. ഇന്ന് വൈകിട്ട് ഇത് സംബന്ധിച്ച് ഔദ്യോഗിക പ്രഖ്യാപനമുണ്ടാകും. ഇന്ന് പുലർച്ചെ എ.ഐ.സി.സി പുറത്തിറക്കിയ അവസാന പട്ടികയിലും വയനാട്ടിലെ സ്ഥാനാർഥിയെ സംബന്ധിച്ച് ഔദ്യോഗിക പ്രഖ്യാപനമുണ്ടായിരുന്നില്ല. തുടർന്ന് രാഹുൽ ഗാന്ധി വയനാട്ടിൽ മത്സരിക്കണമെന്ന് കെ.പി.സി.സി ആവശ്യപ്പെടുകയും ചെയ്തു. കോൺഗ്രസ് ദേശീയ തലത്തിൽ തിരിച്ചുവരാൻ ദേശീയ നേതാക്കൾ തെക്കേ ഇന്ത്യയിൽ മത്സരിക്കണമെന്ന് ആവശ്യമുണ്ടായിരുന്നു. കോൺഗ്രസിന്റെ തിരിച്ചുവരവ് തെക്കേ ഇന്ത്യയിലേക്ക് കൂടുതൽ പടരാൻ രാഹുൽ ഗാന്ധിയുടെ വരവ് വഴി കാണിക്കുമെന്ന് കോൺഗ്രസ് കരുതുന്നു.
രാഹുൽ ഗാന്ധിയുടെ തെരഞ്ഞെടുപ്പ് പ്രവർത്തനങ്ങൾക്ക് നേതൃത്വം നൽകാൻ കഴിയുന്നതിനേക്കാൾ വലിയ അംഗീകാരം മറ്റൊരു കോൺഗ്രസ് പ്രവർത്തകനും ലഭിക്കാൻ ഇടയില്ലെന്ന് വയനാട്ടിലേക്ക് നേരത്തെ നിശ്ചയിച്ച ടി. സിദ്ദീഖ് വ്യക്തമാക്കി.
