ചങ്ങനാശ്ശേരി-ആചാരം തകര്‍ക്കാന്‍ ഏത് മുഖ്യമന്ത്രി ശ്രമിച്ചാലും നടക്കില്ലെന്നും ചെകുത്താന്റെ നാടായി കേരളത്തെ മാറ്റാനാണ് ശ്രമം നടക്കുന്നതെന്നും എന്‍.എസ്.എസ് ജനറല്‍ സെക്രട്ടറി ജി.സുകുമാരന്‍ നായര്‍. സര്‍ക്കാര്‍ നീക്കം ഗാന്ധിയന്‍ സമരത്തിലൂടെ നേരിടുമെന്ന് അദ്ദേഹം വ്യക്തമാക്കി.
എന്‍.എസ്.എസിന് രാഷ്ട്രീയമില്ല. ഏത് രാഷ്ട്രീയം സ്വീകരിക്കാനും അംഗങ്ങള്‍ക്ക് അവകാശമുണ്ട്. സമദൂരത്തെ എതിര്‍ക്കാന്‍ മുഖ്യമന്ത്രിക്ക് അവകാശമില്ലെന്നും സുകുമാരന്‍ നായര്‍ പറഞ്ഞു. മന്നത്ത് പത്മനാഭന്റെ 142ാ മത് ജന്മദിനാഘോഷ ചടങ്ങില്‍ സംസാരിക്കുകയായിരുന്നു അദ്ദേഹം.
ആചാരവും അനാചാരവും അറിയാത്തവരാണ് നവോത്ഥാനം പഠിപ്പിക്കാന്‍ വരുന്നത്. എന്‍എസ്എസ് മന്നത്തിന്റെ പാതയിലല്ല എന്നുപറയാന്‍ മുഖ്യമന്ത്രിക്ക് അവകാശമില്ല. എന്‍.എസ്.എസ് അംഗങ്ങള്‍ക്ക് ഏതുരാഷ്ട്രീയവും സ്വീകരിക്കാം. സംഘടനയ്ക്കുള്ളില്‍ രാഷ്ട്രീയം കലര്‍ത്താന്‍ ആരെയും അനുവദിക്കില്ല. ശബരിമല വിഷയത്തില്‍ സര്‍ക്കാര്‍ എത്ര തവണ മലക്കം മറിഞ്ഞുവെന്ന് സുകുമാരന്‍ നായര്‍ ചോദിച്ചു. ശബരിമല വിഷയത്തില്‍ പ്രതികരിച്ചത് എല്ലാവര്‍ക്കും വേണ്ടിയാണെന്നും അദ്ദേഹം അവകാശപ്പെട്ടു.
