ന്യൂദല്‍ഹി- ബഹിരാകാശത്തേക്ക് മനുഷ്യരെ അയക്കുന്ന ഇന്ത്യയുടെ ആദ്യ പദ്ധതിയായ ഗഗന്‍യാന്‍ ദൗത്യത്തിന് 10,000 കോടി രൂപ കേന്ദ്ര സര്‍ക്കാര്‍ അനുവദിച്ചു. ഏഴു ദിവസത്തേക്ക് മൂന്ന് ഇന്ത്യക്കാരെ ബഹിരാകാശത്തേക്ക് അയക്കാനാണു പദ്ധതിയെന്ന് കേന്ദ്ര നിയമ മന്ത്രി രവിശങ്കര്‍ പ്രസാദ് പറഞ്ഞു. ഈ ദൗത്യം 2022-ഓടെ യാഥാര്‍ത്ഥ്യമാക്കാന്‍ ലക്ഷ്യമിടുന്നതായി നേരത്തെ ഇന്ത്യന്‍ സ്‌പെയ്‌സ് റിസര്‍ച്് ഓര്‍ഗനൈസേഷന്‍ (ഐ.എസ്.ആര്‍.ഒ) മേധാവി ഡോ. കെ. ശിവന്‍ നേരത്തെ വ്യക്തമാക്കിയിരുന്നു. ഐഎസആര്‍ഓയുടെ ഏറ്റവും വലിയ റോക്കറ്റായ ജിയോസിങ്ക്രണസ് സാറ്റലൈറ്റ് ലോഞ്ച് വെഹീക്ക്ള്‍ മാര്‍ക്ക് III (ജി.എസ്.എല്‍.വി എംകെ III) ആണ് ഈ ദൗത്യത്തിന് ഉപയോഗിക്കുക.
റഷ്യ, യുഎസ്, ചൈന എന്നീ രാജ്യങ്ങള്‍ക്കു ശേഷം ബഹിരാകാശത്തേക്ക് മനുഷ്യരെ അയക്കുന്ന നാലാമത്തെ രാജ്യമാകാനുള്ള ഒരുക്കത്തിലാണ് ഇന്ത്യ. ഇന്ത്യയുടെ ഒരേ ഒരു ബഹിരാകാശ യാത്രികന്‍ രാകേഷ് ശര്‍മ 1984ല്‍ റഷ്യന്‍ ബഹിരാകാശദൗത്യത്തിന്റെ ഭാഗമായാണ് ബഹിരാകാശത്ത് എത്തിയത്.
