റിയാദ് - ഒരു വര്‍ഷത്തിനിടെ സുരക്ഷാ വകുപ്പുകള്‍ നടത്തിയ റെയ്ഡില്‍ പിടിയിലായ നിയമ ലംഘകരുടെ എണ്ണം 20 ലക്ഷം കവിഞ്ഞതായി ആഭ്യന്തര മന്ത്രാലയം അറിയിച്ചു. 15,57,718 ഇഖാമ നിയമ ലംഘകരും 3,12,016 തൊഴില്‍ നിയമ ലംഘകരും 1,46,390 നുഴഞ്ഞുകയറ്റക്കാരും അടക്കം 20,16,124 പേരാണ് ഒരു വര്‍ഷത്തിനിടെ പിടിയിലായത്.
ഇക്കാലയളവില്‍ അതിര്‍ത്തികള്‍ വഴി രാജ്യത്ത് നുഴഞ്ഞുകയറുന്നതിന് ശ്രമിച്ച 34,299 പേരും അനധികൃത രീതിയില്‍ രാജ്യം വിടുന്നതിന് ശ്രമിച്ച 2,918 പേരും അറസ്റ്റിലായി. ഇവരില്‍ 53 ശതമാനം യെമനികളും 44 ശതമാനം ഏതോപ്യന്‍ വംശജരും മൂന്ന് ശതമാനം പേര്‍ ഇതര രാജ്യക്കാരുമാണ്. ഇഖാമ, തൊഴില്‍ നിയമ ലംഘകര്‍ക്ക് സഹായ സൗകര്യങ്ങള്‍ ചെയ്തുകൊടുത്ത 2,918 വിദേശികളും 803 സൗദികളും സുരക്ഷാ വകുപ്പുകളുടെ പിടിയിലായി. നിയമലംഘനത്തിന് ഒത്താശ ചെയ്ത് പിടിയിലായ സ്വദേശികളില്‍ 773 പേര്‍ക്കെതിരെ ശിക്ഷാനടപടികള്‍ സ്വീകരിച്ചു വിട്ടയച്ചു. 30 പേര്‍ക്കെതിരായ നടപടികള്‍ പുരോഗമിക്കുകയാണ്. നിലവില്‍ നിയമനടപടികള്‍ നേരിടുന്ന 13,735 വിദേശികളില്‍ 12,055 പേര്‍ പുരുഷന്മാരും 1680 പേര്‍ വനിതകളുമാണ്. 5,17,290 നിയമലംഘകരായ വിദേശികളെ ഒരു വര്‍ഷത്തിനിടെ നാടുകടത്തിയതായും ആഭ്യന്തര മന്ത്രാലയം അറിയിച്ചു.
