റിയാദ് - റിയാദ് തൊഴിൽ, സാമൂഹിക വികസന മന്ത്രാലയ ശാഖയും സുരക്ഷാ വകുപ്പുകളും വാണിജ്യ, നിക്ഷേപ മന്ത്രാലയവും നഗരസഭയും സഹകരിച്ച് കഴിഞ്ഞയാഴ്ച റിയാദ് പ്രവിശ്യയിലെ വ്യാപാര സ്ഥാപനങ്ങളിൽ നടത്തിയ റെയ്ഡുകളിൽ 60 നിയമ ലംഘനങ്ങൾ കണ്ടെത്തി. ഈ സ്ഥാപനങ്ങൾക്ക് പിഴ ചുമത്തി. നിയമ ലംഘനങ്ങൾക്ക് 44 സ്ഥാപനങ്ങൾക്ക് വാണിംഗ് നോട്ടീസ് നൽകി. ജ്വല്ലറികൾ, റെന്റ് എ കാർ സ്ഥാപനങ്ങൾ, മൊബൈൽ ഫോൺ കടകൾ, ഹോട്ടലുകൾ, ഫർണിഷ്ഡ് അപാർട്ട്‌മെന്റുകൾ അടക്കമുള്ള സ്ഥാപനങ്ങളിലാണ് പരിശോധനകൾ നടത്തിയത്. റിയാദിനു പുറമെ, പ്രവിശ്യയിൽ പെട്ട അൽഖർജ്, അഫ്‌ലാജ്, വാദി ദവാസിർ, സുൽഫി, അൽഗാത്ത്, മജ്മ, ശഖ്‌റാ, മുസാഹ്മിയ, ദവാദ്മി, സുലൈൽ, ഹോത്ത ബനീ തമീം, സുദൈർ എന്നിവിടങ്ങളിലെ സ്ഥാപനങ്ങളിൽ വിവിധ വകുപ്പുകൾ സഹകരിച്ച് കഴിഞ്ഞയാഴ്ച പരിശോധനകൾ നടത്തിയതായി റിയാദ് തൊഴിൽ, സാമൂഹിക വികസന മന്ത്രാലയ ശാഖാ മേധാവി യൂസുഫ് അൽസയ്യാലി പറഞ്ഞു.
