കണ്ണൂര്‍- സര്‍ക്കാര്‍ ജീവനക്കാരുടെ ശമ്പളവും പെന്‍ഷനും മുടങ്ങില്ലെന്ന് ധനമന്ത്രി കെ. എന്‍. ബാലഗോപാല്‍. കണ്ണൂരില്‍ മാധ്യമ പ്രവര്‍ത്തകരോട് സംസാരിക്കുകയായിരുന്നു മന്ത്രി.
സാങ്കേതികമായ ചില പ്രശ്നങ്ങളാണ് വന്നത്. കേന്ദ്രം ഈ മാസം തരേണ്ടിയിരുന്ന 13600 കോടി തന്നിട്ടില്ല. ഈ മാസം ആറിനും ഏഴിനുമായി കേരളത്തിന്റെ കേസ് സുപ്രീം കോടതി പരിഗണിക്കാനിരിക്കുകയാണ്. കേസിനു പോയതുകൊണ്ട് കിട്ടേണ്ട പണം കേന്ദ്രം തരാതിരിക്കുന്ന അവസ്ഥയാണുള്ളത്. മര്യാദയ്ക്ക് കേസ് പിന്‍വലിക്കണം എന്ന വാക്ക് ഉപയോഗിച്ചില്ല എന്നേയുള്ളൂ- മന്ത്രി പറഞ്ഞു.
ഇന്ത്യയിലെ മറ്റ് സംസ്ഥാനങ്ങള്‍ക്ക് എല്ലാം കേന്ദ്രം പണം കൊടുക്കുന്നുണ്ട്. ശമ്പളവും പെന്‍ഷനും മുടങ്ങുന്ന സ്ഥിതിയില്ല. അങ്ങനെയൊരു അവസ്ഥ വരില്ല. ചരിത്രത്തിലാദ്യമായി ശമ്പളം വന്നില്ലെന്ന് പത്രങ്ങള്‍ എഴുതി. എല്ലാവരുടെ അക്കൗണ്ടുകളും പണം എത്തിയിട്ടുണ്ട്.
ചരിത്രത്തിലാദ്യമായി സംസ്ഥാനത്തിന് കൊടുക്കേണ്ട പണം കേന്ദ്രം കൊടുത്തിട്ടില്ല. അതല്ലേ എഴുതേണ്ടത്- മന്ത്രി ചോദിച്ചു.
മന്ത്രിമാരും മുഖ്യമന്ത്രിയും ഡല്‍ഹിയിലും സമരം ചെയ്തിട്ടുണ്ട്. ജീവനക്കാര്‍ സെക്രട്ടറിയേറ്റില്‍ സമരം ചെയ്യുന്നത് വളരെ നല്ല കാര്യമാണ്. യഥാര്‍ഥത്തില്‍ രാജ്ഭവനില്‍ ആണ് സമരം ചെയ്യേണ്ടതെന്നും മന്ത്രി ബാലഗോപാല്‍ പറഞ്ഞു.
