അബുദാബി- അബുദാബി സായിദ് ഇന്റര്നാഷണല് എയര്പോര്ട്ടിലെ യാത്രക്കാരുടെ ആരോഗ്യ സംരക്ഷണം മെച്ചപ്പെടുത്തുന്നതിനും കാര്യക്ഷമമാക്കുന്നതിനുമായി എയര്പോര്ട്സും ബുര്ജീല് ഹോള്ഡിംഗ്സും ധാരണാപത്രം (എംഒയു) ഒപ്പുവെച്ചു.
കരാര് പ്രകാരം സായിദ് ഇന്റര്നാഷണല് എയര്പോര്ട്ടില് ലഭ്യമായ അത്യാധുനിക ആരോഗ്യസൗകര്യങ്ങളിലേക്ക് ബുര്ജീല് ഹോള്ഡിംഗ്സിലെ ആരോഗ്യമേഖലാ വൈദഗ്ധ്യത്തെ കൊണ്ടുവരികയും പ്രീമിയം ഹെല്ത്ത് കെയര് ഓഫറുകളിലൂടെ യാത്രക്കാരുടെ അനുഭവം പുനര്നിര്വചിക്കുകയും ചെയ്യുമെന്നാണ് പ്രതീക്ഷ.
സായിദ് ഇന്റര്നാഷണല് എയര്പോര്ട്ടില് ക്ലിനിക്ക് തുറക്കുന്നതിനും പ്രവര്ത്തിപ്പിക്കുന്നതിനും അബുദാബി എയര്പോര്ട്സും ബുര്ജീല് ഹോള്ഡിംഗ്സും സഹകരിക്കും. യാത്രക്കാര്ക്ക് 24 മണിക്കൂറും ഉയര്ന്ന നിലവാരമുള്ള വൈദ്യസഹായം നല്കും. അതിഥികള്ക്ക് വിമാനത്താവളത്തില്നിന്ന് പുറത്തുപോകാതെ തന്നെ ആരോഗ്യപരിരക്ഷ ഉറപ്പാക്കുകയും ചികിത്സ തേടുന്നവര്ക്ക് യാത്രാ തടസ്സങ്ങള് കുറയ്ക്കുകയും ചെയ്യും. ആശുപത്രിയിലേക്ക് മാറ്റുന്നതിന് മുമ്പ് യാത്രക്കാരുടെ അവസ്ഥ സുസ്ഥിരമാക്കുന്നതിന് സൗജന്യ ആരോഗ്യ പരിരക്ഷയും ഇതില് ഉള്പ്പെടും. ആശുപത്രിയില് പ്രവേശനം ആവശ്യമുള്ളവര്ക്കായി അടുത്തുള്ള ബി.എം.സിയില് ലഭ്യമായ ലോകോത്തര സൗകര്യങ്ങളുമായും വൈദഗ്ധ്യവുമായും ക്ലിനിക് ബന്ധിപ്പിച്ചിരിക്കുന്നു. അബുദാബി എയര്പോര്ട്ട് സ്റ്റാഫ് അംഗങ്ങള്ക്കും അവരുടെ കുടുംബങ്ങള്ക്കും അധിക ആനുകൂല്യങ്ങള് ലഭ്യമാകും.
ലോകത്തിലെ ഏറ്റവും ചലനാത്മകമായ എയര്പോര്ട്ടുകളിലൊന്നായ അബുദാബി എയര്പോര്ട്ട് കമ്പനിയുമായി സഹകരിക്കുന്നതില് അഭിമാനമുണ്ടെന്ന് ബുര്ജീല് ഹോള്ഡിംഗ്സ് സ്ഥാപകനും ചെയര്മാനുമായ ഡോ. ഷംഷീര് വയലില് പറഞ്ഞു. ഞങ്ങളുടെ അത്യാധുനിക സൗകര്യത്തിലൂടെ, ഒരു സംയോജിത ശൃംഖലയുടെ പിന്തുണയോടെ, യാത്രാനുഭവം മെച്ചപ്പെടുത്താനും ആരോഗ്യകരവും സുരക്ഷിതവുമായ ഒരു യാത്രാസമൂഹത്തെ പരിപോഷിപ്പിക്കാനും ലക്ഷ്യമിടുന്നു. പരമ്പരാഗത ആരോഗ്യ സംരക്ഷണ സജ്ജീകരണങ്ങള്ക്കപ്പുറത്തേക്ക് നമ്മുടെ വ്യാപ്തിയും സ്വാധീനവും വ്യാപിപ്പിക്കാനുള്ള ഞങ്ങളുടെ കാഴ്ചപ്പാടിനെ പ്രതിഫലിപ്പിക്കുന്ന, ആരോഗ്യ സംരക്ഷണ മികവില് പുതിയ മാനദണ്ഡങ്ങള് സ്ഥാപിക്കുന്നതിനുള്ള ഞങ്ങളുടെ യാത്രയിലെ സുപ്രധാന നാഴികക്കല്ലാണ് ഈ സംരംഭം. സായിദ് ഇന്റര്നാഷണല് എയര്പോര്ട്ടിലെ ഞങ്ങളുടെ ക്ലിനിക്കിന്റെ വാതിലുകള് തുറക്കാന് ഞങ്ങള് തയ്യാറെടുക്കുമ്പോള്, ഓരോ യാത്രക്കാരുടെയും യാത്രയുടെ അവിഭാജ്യ ഘടകമായി മാറാന് ഞങ്ങള് ആഗ്രഹിക്കുന്നു- അദ്ദേഹം പറഞ്ഞു.
