മലപ്പുറം- കാന്തപുരം അബൂബക്കർ മുസ്ലിയാർ നേതൃത്വം നൽകുന്ന സമസ്ത കേരള ജംഇയ്യത്തുൽ ഉലമയുടെ പുതിയ ഭാരവാഹികളെ തിരഞ്ഞെടുത്തു. ഇ സുലൈമാൻ മുസ്ലിയാർ ഒതുക്കങ്ങലാണ് പ്രസിഡന്റ്. കാന്തപുരം എ പി അബൂബക്കർ മുസ്‌ലിയാരാണ് ജനറൽ സെക്രട്ടറി. പി.ടി കുഞ്ഞമ്മു മുസ്‌ലിയാരാണ് ട്രഷറർ. മലപ്പുറത്ത് ചേർന്ന പണ്ഡിത സമ്മേളനത്തിലാണ് പ്രഖ്യാപനം. സയ്യിദ് അലി ബാഫഖി തങ്ങൾ, പി.എ ഐദ്രൂസ് മുസ്്‌ലിയാർ കൊല്ലം, കെ.എസ് ആറ്റക്കോയ തങ്ങൾ കുമ്പോൽ (വൈ. പ്രസിഡന്റുമാർ). പി. അബ്ദുൽ ഖാദിർ മുസ്്‌ലിയാർ പൊന്മള, പേരോട് അബ്ദുറഹ്മാൻ സഖാഫി, സയ്യിദ് ഇബ്‌റാഹീമുൽ ഖലീൽ അൽ ബുഖാരി (സെക്രട്ടറിമാർ).
സമസ്ത പ്രസിഡന്റ് ഇ.സുലൈമാൻ മുസ്ലിയാരുടെ അധ്യക്ഷതയിൽ സമസ്ത ഉപാധ്യക്ഷൻ കുമ്പോൽ സയ്യിദ് ആറ്റക്കോയതങ്ങൾ ഉദ്ഘാടനം ചെയ്തു. സമസ്ത ജനറൽ സെക്രട്ടറി കാന്തപുരം എ.പി അബൂബക്കർ മുസ്ലിയാർ മുഖ്യപ്രഭാഷണം നടത്തി. സമസ്ത ഉപാധ്യക്ഷൻ സയ്യിദ് അലി ബാഫഖി തങ്ങൾ പ്രാർത്ഥന നടത്തി. സംസ്ഥാനത്തെ വിവിധ ജില്ലകളിൽനിന്നുള്ള കൂടിയാലോചന സമിതി(മുശാവറ)അംഗങ്ങളും മേഖലാ ഭാരവാഹികളുമായിരുന്നു സമ്മേളന പ്രതിനിധികൾ.
ഏകദിന പണ്ഡിത സംഗമത്തിൽ മതം, ദൈവം, യുക്തി, രാഷ്ട്രം, രാഷ്ടീയം, അനുഷ്ഠാനം, ആചാരം തുടങ്ങി വിവിധ സെഷനുകൾക്ക് സമസ്ത സെക്രട്ടറിമാരായ പൊന്മള അബ്ദുൽ ഖാദിർ മുസ്ലിയാർ, സയ്യിദ് ഇബ്‌റാഹീമുൽ ഖലീൽ അൽ ബുഖാരി, പേരോട് അബ്ദുറഹ്മാൻ സഖാഫി, സമസ്ത കേന്ദ്ര മുശാവറ അംഗങ്ങളായ ചെറുശ്ശോല അബ്ദുൽ ജലീൽ സഖാഫി, കൊളത്തൂർ അലവി സഖാഫി എന്നിവർ നേതൃത്വം നൽകി. സയ്യിദ് ഫളൽ കോയമ്മതങ്ങൾ എട്ടിക്കുളം, പി. എ ഐദ്രൂസ് മുസ്്‌ലിയാർ കൊല്ലം, കെ.പി മുഹമ്മദ് മുസ്്‌ലിയാർ കൊമ്പം, കെ.കെ അഹ്മദ് കുട്ടി മുസ്്‌ലിയാർ കട്ടിപ്പാറ, വണ്ടൂർ അബ്ദുറഹ്മാൻ ഫൈസി, അബൂഹനീഫൽ ഫൈസി തെന്നല, എ.പി അബ്ദുള്ള മുസ്്‌ലിയാർ മാണിക്കോത്ത്, സി. മുഹമ്മദ് ഫൈസി, ഡോ. ഹുസൈൻ സഖാഫി ചുള്ളിക്കോട്, ഡോ. എ.പി അബ്ദുൽ ഹകീം അസ്ഹരി എന്നിവർ സംബന്ധിച്ചു.
